推し疲れ

今日純雜談。但我冇自信可以令各位都睇得明我想講咩… 抱歉。可能唔睇比較好,但蝠想記錄一下而家呢一刻嘅想法。

啱啱喺twitter見到個trend「推し疲れ」,咁啱同尋晚睇咗一個演出家+役者嘅blog有少少呼應,亦都好啱而家嘅自己用。

回流冇幾耐之後唔知咩事開始儲起DVD上嚟,去到自己都唔知點解買嘅地步。好多DVD我都冇睇,興趣都唔大,但就係。點名講,2015年、2016年、2017年MM出嘅DVD/blu-ray我全部都有,包括咗個人嘅BDE嗰啲,就係連唔知喺唔喺排名上嘅人嘅個人DVD我都有入手,仲有順便見到舊嘅DVD價錢啱都會入手,但我諗我睇咗1/10都冇。但嗰時有返工而且個pay唔錯,正所謂玩得起。直到どぅーさん畢業之後我都仲買咗一段時間,總係覺得要有、要齊。

呢個心理狀態どぅーさん畢業之後直接轉駁到こぶし。當時こぶし啲嘢唔貴,而且得8個人,蝠就開始成group儲。到後來得返5個更加係所有嘢都5份。唔知點解唔齊就好唔安樂咁。生寫就算係こぶし嘅都係,買咗返嚟大部份都不見天日(還記得嗰幾舊磚嗎?),有部份有幸入咗相簿,都係入完擺埋唔會睇返。

到こぶし散解咗,但病態冇完。明明唔係推唔知點解買但係都係會買。好似係用喺こぶし身上嘅錢「多咗出嚟」就必定要轉去俾另一個人咁。仲會自己刻意去搵新目標,明明推都唔係就開始收めいちゃん嘅嘢。買咗返嚟有冇望多眼?其實係冇嘅。但就係有種義務感使命感好似一定要儲,買嘅時候冇諗係咪想要,甚至我係會走去elineupmall,search個成員個名之後將new嘅全部入cart結帳。寄到返嚟掉曬返櫃桶… 到櫃桶滿咗就入紙箱pack走… 我諗我都唔知自己買咗啲乜。

身邊唔係fans嘅朋友唔會主動走去話我(佢哋都唔清楚我點買idol goods),係fans嘅朋友某程度上都有類似嘅收集癖。於是喺我嘅世界入面呢樣嘢好正常,做fans就要支持嘛,用咩方法支持,咪就係買goods,收齊啲嘢。仲會覺得自己都已經唔係無限回收,已經係理性嘅一族(?) idol們都會用各式各樣嘅方式希望得到fans嘅支持,「記得支持我喔」、「記得要嚟live呀」、「賣緊啲乜乜乜記得買喔」等等。當然只係去instagram like曬啲嘢,去twitter retweet曬啲嘢,去blog度留言呢啲都絕對係支持,亦冇唔妥,佢地都會話好高興。但除咗呢啲形態上嘅嘢,「支持」入面絕大部份都係要攞錢出嚟嘅實質嘢,當然fans同idol之間本來就係呢種關係,我冇覺得唔妥,一直就係咁活過來。唔會去諗究竟自己所謂嘅「支持」係到唔到,同埋真係「支持」咗啲乜。有人會駁我話你買goods係有嘢到手,你自己都開心高興,咁就算所謂嘅「支持」唔會直接去到idol度,都唔係問題。但係如果我話,goods已經唔知幾時開始由「好想要嘅嘢」,變成「一定要買嘅嘢」,再變成咗「買咗冇用嘅嘢」呢?

當然蝠都係成年人,理性係有嘅。我唔會話傾家蕩產,問銀行借都死要買。只係我已經好耐冇喺自己俾咗錢嘅嘢裡面得到快樂,但一直都係咁已經成為咗習慣,而我自己唔覺。

其實都有突然醒覺嘅位,但自己預設咗去忽略。hello shop咪每個月都會出月別嘅?我好耐之前已經有個個月買自己鍾意嘅成員,但again買咗返嚟我都唔會點睇,但就係覺得唔可以miss。我有問過自己點解唔可以miss,但冇好似強迫症咁,唔買硬係周身唔舒服。

之前盲買DVD,想唔買都花咗幾個月時間去停,最後只係停咗MM嗰啲。但其實停咗都冇乜嘢,過咗時限買唔到我都唔會好渴望得到佢,真係只係可以訂嘅時候真係好有購買慾,到而家都有。

一直浸喺hello嘅ecosystem,就好似溫水煮蛙,唔覺得有問題。以前買嘢係令自己快樂,而家變咗唔買擔心會唔快樂。又或者可以話,以為買咗會快樂但事實係說明咗另一樣嘢。こぶし嘅解散雖然冇即時令我發現問題,但就令問題明顯咗,令我不得不面對。

上面提到嗰位演出家嘅blog入面寫到:

「無理してまで追いかけようとしてしまうと、いつしか「義務」になり「面倒な用事」になってしまいます。」
「勉強去追,唔知幾時會變成「義務」,然後再演變成「麻煩嘅事」。」

我睇到呢時候覺得完全就係我而家嘅狀態,同時亦都推我行咗處理佢嘅第一步。因為而家追hello對我嚟講已經去咗上述嘅「麻煩事」階段。就係因為我勉強咗自己,要去要去要去要賣要賣要賣要齊要齊要齊,變成咗義務覺得一定要、唔做唔得。就係因為咁開始覺得煩… 不知不覺間已經完全變咗一件麻煩嘅事。

講得清楚啲,追hello已經由之前嘅好開心,變成一定要追一定要支持一定要睇嘅義務,再變成咗而家覺得係好麻煩嘅事。

仲有鍾意嘅成員,但我唔想自己再惡化落去。方法强硬少少都好,我已經決定咗要處理。最近蝠走咗入另一個ecosystem,嗰種有衷嘅期待同興奮真係好久違地令我醒起娛樂應該係令我快樂,而唔係責任。

今次我唔會勉強去追,唔會俾佢變成義務,而係因為想去睇而睇。同時剛好比咗啲空間我抽離hello少少去解決現有嘅問題。

Share on FacebookShare on Google+Tweet about this on Twitter

Leave a reply


Optionally add an image (JPEG only)