キミノタケ

2/17~2/25喺こくみん共済 coop ホール(全労済ホール)/スペース・ゼロ上演,はまちゃん個人發展後第二套舞台劇 – 「キミノタケ」。繼上次「あいまいばかりの世界」之後再次係Flying Trip嘅製作。

今次はまちゃん演嘅係有錢女城ヶ崎恵(メグ),係兩個男主角圭人同修二嘅朋友。

兩兄弟嘅哥哥圭人係靈媒,而弟弟修二冇固定工作,靠打工為生但每次都做唔長。佢內心好鍾意メグ,但又唔敢講出嚟,因為佢知道メグ鍾意嘅係諸星くん。諸星くん係明星,做緊啲兒童節目,但佢其實係想做動作影星。佢知道メグ鍾意佢,就一邊keep住佢,同時又同メグ好朋友嘅京香拍拖,仲叫京香唔好同メグ講住。我唔知佢為乜要咁,可能係因為メグ係有錢女,佢想利用佢。

就喺呢個時候,メグ發現咗諸星くん同佢好朋友京香原來拍緊拖,覺得被騙。修二知道咗之後去安慰メグ,講講下向佢表白咗,但メグ就表示暫時冇得發展。

呢個時候一個叫德永嘅人接觸諸星くん,佢話自己開藝能事務所向佢挖角,諸星くん正同事務所有啲分歧,想轉過間。心大心細,於是就去咗信賴嘅靈媒圭人度問佢可唔可以幫佢睇下德永係咪真係好公司(注:諸星くん同圭人係認識,而且一直相信佢嘅能力,有大決定都會搵佢幫手決定),但圭人就好反常地吞吞吐吐唔係好想咁。

然後諸星くん本身嘅事務所原來嗰間公司本身係黑底,收到風呢個德永要挖佢嘅人,就想辦法搞德永,但德永都唔係綿羊,好似唔係好怕佢哋。公司老闆就話要搵究竟邊個介紹德永俾諸星くん識,查查下就查到係佢地喺メグ個生日party識嘅,就搵メグ麻煩。

圭人最後都決定幫諸星くん,佢猶疑原來係因為其實佢係假嘅,真嘅靈媒係細佬修二,但修二想低調,圭人就扮靈媒,由修二提供訊息。但佢哋會見德永嘅期間,修二收到電話話メグ被人捉咗,就趕咗去救佢。冇咗修二圭人根本就睇唔到人嘅氣場,只係喺度拖時間。等到唔耐煩嘅德永就話佢一早就知圭人其實乜都睇唔到,佢要玩到幾時?

修二去救メグ嘅時候見到諸星くん事務所老闆有心結,救咗メグ之後又唔知點解帶咗佢返圭人嘅office,又唔知點解老闆突然又認出德永係30年前佢放貴利嘅人… 總之就係德永當年係新人電影監製,為咗拍電影借咗錢之後還唔起搞到好慘。唔知點搵到錢之後返嚟報仇,所以故意去搶佢旗下嘅明星(WTF?!

又唔知點修二話老闆其實為當年嘅事好後悔,又唔知點德永放下仇恨離開,本來死都要攬住諸星くん唔放嘅老闆又突然同佢さよなら(WTF?!

最後就大事化小,小事化無… 諸星くん自己去到美國… 其他人就好似原地冇郁過咁(WTF?!

睇到呢度,希望各位blog友都有發現個故事九唔搭八到一個蝠都唔知點形容嘅地步。尤其係最後嘅三個WTF。因為はまちゃん而睇咗嘅兩次flying trip嘅劇,真係… 唔係太得。上次嘅「あいまいばかりの世界」蝠睇完都勉強砌得返個故事出嚟,但今次呢套「キミノタケ」我真係完全睇唔到重點。

首先我覺得人設係OK嘅。

  • メグ有錢女之中仲有一個設定係佢有個小學就死咗嘅家姐,一直喺佢身邊守護佢(修二睇到)
  • 修二同圭人有個有靈力嘅媽媽,佢兩個細個時都有靈力,但大大下圭人就冇曬,得返修二有
  • 圭人嘅助手有個中國嘅女仔,係修二嗰時喺夜總會打工識嘅女仔,後來因為個女仔被炒就叫咗佢去幫圭人

呢三個setting我以為係重要會發展落去,但end up完全只係setting,一啲用途都冇!我明白人設係要有background,但舞台劇開始嘅時候爆曬出嚟但完全唔收返嘅時候,我作為觀眾會覺得掉咗啲伏線出來完全唔用又完全唔收。我最愛嘅演出家末満健一さん嘅TRUMP嘅人設都好有background,但係佢唔會將啲setting亂咁掉出嚟。好似リリー其實成個人生(?) 都已經被佢set好曬,但一次嘅舞台就只會用到啲同嗰次有關嘅,唔係將個設定口頭講曬出嚟就算咁囉。奇奇怪怪咁。

嗰個中國嘅女仔完全只係一個助手,佢嘅話佢講兩講就完咗。完全同佢嘅國藉冇關係嘅,咁… 想表達啲咩呢?

修二同佢哥嘅setting又係,點解要set到本身兩個都有靈力但大大下冇咗得返修二有?喂你掉咗咁多”疑團”出嚟,都收返下吖?比如話圭人因為自己冇咗能力而喺細佬面前抬唔起頭之類呀咁都叫做”用”過個setting吖?

メグ家姐仲奇,佢一開始講到佢有個守護靈,我以為佢有危險咁時佢家姐會出手啦,冇囉又!咁佢家姐呢個設定又係想點呢?

其實上述諸星くん點解要呃住メグ都完全冇講,除咗佢係渣男之外我完全唔明點解。

I mean,最簡單一個問題:以上嘅setting冇咗,或者唔講出嚟對個故事有咩影響呢?最少我個人覺得冇囉。

另外最尾真係好似趕收工咁,無限嘅巧合、無限嘅突然、無限嘅理解不能…

話說我都明白演劇做嘅嘢唔一定太邏輯,可以天馬行空,可以突然之間唱歌跳舞,唔係下下都要完全合理。我認為自己已經係極之睇劇唔駁嘅人… 只要個世界觀係咁我入咗去好多離奇嘅設定我都好接受。但今次我實在係由頭到尾都代入唔到又理解唔到。我一共睇咗兩次,第一次真係唔知睇唔明定入唔到腦,於是第二次我係take住note咁睇(因為打算寫blog),資料收好曬,但都係覺得「好多事發生咗,但完全睇唔到個point」。或者我直接接受成件事只係為咗睇はまちゃん,套劇本身冇point就算(努力忘記佢其實戲份/對白都唔係好多…)。

雖然「キミノタケ」係はまちゃん有份演出嘅舞台劇,我好感激flying trip又再一次搵佢演,都好感激有配信令到我可以唔洗等blu-ray可以快啲睇到はまちゃん。但內容真係半點都唔收貨囉。不過如果問はまちゃん可唔可愛~~~ 咁就絕對收曬貨啦!!♡

はまちゃん6月取代咗田中れいな出演舞台「剣が君-残桜の舞-」嘅再演。唔係特別鍾意睇時代劇,但真係好開心はまちゃん有演出嘅機會。希望內容滿意啦!

Share on FacebookShare on Google+Tweet about this on Twitter

Leave a reply


Optionally add an image (JPEG only)