握手天才

早一排(應該係大約兩個星期之前)睇返SKE嘅節目「SKE48のIDOL x IDOL」。
呢一個節目好似係名古屋嗰邊嘅電視台响2月份播嘅,只有4集。每一集呢,佢地請到以前嘅偶像歌手出黎傾下計,咁SKE呢,就唱下佢地以前嘅名曲,交流下做偶像之道咁。仲有出名猛推48系嘅藝人山里亮太做主持。

雖然我覺得以前嗰套而家已經唔work,但係畢竟有機會俾SKE嘅小妹妹多了解同接觸佢地嘅前輩都不失為一件好事!

我唔記得咗係邊一集,好似係第一集?佢地提到握手會對偶像歌手嘅重要性。身為AKB fans嘅山里,就講咗去握手會嘅fans嘅心情。

當中佢提到,去咗握手會嘅fans大部份都會好緊張,所以佢地嘅對應係好重要。佢地要識得lead住個mood。如果fans講到野就當然好,但係如果fans太緊張而開唔到口,咁佢地嗰邊要懂得打開個話題。

山里仲講咗一件事出黎,大讚由紀係握手天才。
話說有一個好怕羞嘅中三生去同由紀握手。由於佢真係好怕羞,佢全程都唔敢望由紀,只係伸隻手出去,低著頭佢由紀講,話佢今年要考高校,希望由紀同佢講一句加油。點解等咗一陣,由紀都係無出到聲。個男仔覺得好奇怪,做乜由紀唔同佢講嗰句加油。於是佢慢慢咁抬起頭,睇下發生咩事。呢個時間由紀就笑住咁望住個男仔,話:「終於望到你啦,你高考要加油喔!」(原文:やっと目があったね!受験頑張ってね!)

我聽到呢件事,真係覺得好精彩。證明咗由紀握手,唔係敷衍了事,而係用心對待每一個前來握手嘅fans。而且佢嘅態度係會令人好舒服。聽完呢件事之後,我一年來嘅心結終於解開咗(←洗唔洗講到心結咁誇張啊?)

其實呢篇post我都講過,我上次去個別握手會(其實係寫真會啦)嘅時候,4個成員入面,我最relax就係由紀。
去到握手會係真係會緊張到個腦一片空白啊。尤其係我呢啲唔係成日見到佢地嘅人。 但係去之前用咗好大嘅努力去不停練習我要同玲奈講乜,所以玲奈基本上係唔用腦都講到要講嘅時。

HOWEVER,其他成員我就零準備啦。所以我係超級無敵地緊張啦。入到去幾乎係唔知講乜。但係唔知點解喎,排嘅時候仲好驚,但係一入到去見到由紀,竟然覺得好舒服咁。同佢講完野,影完相,我仲要同佢講我後面嘅人(我識嘅人啦of course)唔識日文,叫佢多多指教。當時由紀俾我嘅反應同態度,我到而家都仲好記得。之後聽返同我一齊去嘅人講,佢不停咁用英文同由紀講野,由紀好明顯係唔識聽,但係佢依然好用心咁聽佢講好努力咁去理解佢想講乜。同我一齊去嘅呢個人本身唔係fans,但係佢去完,就有少少鍾意咗由紀,仲講咗幾次由紀真係好nice咁話。而我亦都要認嘅係,我去完呢次握手會之後,比之前更加鍾意由紀。

我返黎之後一直都响度諗,點解會咁呢?點解係得由紀一個會咁relax呢?仲要因為咁relax所以我反而記得好多同佢交流時嘅細節!同玲奈嘅時間反而係無乜記憶==;

聽完山里講嘅故事,我就恍然大悟嘅感覺!明白晒啦。
原來因為由紀係握手嘅天才!佢可以令到前來握手嘅fans覺得relax同舒服!
嗯!呢個就係小蝠嘅結論。

講開由紀,今朝俾佢嚇死。
一返到公司開佢個blog睇,就見到以下呢張相。

本來都無乜特別,最嚇人係佢竟然話自己染咗頭髮。噹!==;
小蝠係黑髮族,亦都係黑髮萌。
係咪黑頭髮對我黎講係非常之重大嘅事!!當時即時呆咗,心諗:唔係掛?搞啲咁嘅野!!!

好彩,最後發現係由紀玩野,我俾人呃咗。呼~
唔係講笑,由紀如果真係染咗頭髮,佢响我心目中嘅分數可能會減半…

Share on FacebookShare on Google+Tweet about this on Twitter

4 Responses to 握手天才

    • 係呀!握手會要預先諗定對白… 如果唔係就會啞口無言… 就好似我同優子握手嘅時候咁>_< 諗起都覺得遺憾… 睇你俾我條link,好似未有得訂喎?不過我買硬架啦呢隻!!!

  1. 小蝠,不知你有無睇最近一集Akbingo呢,介紹WR7首新歌時,角落頭有幾個小字︰期間限定組合WR7 ! 我估都可以舒左大家一口氣掛 !
    WR應該會係下張碟回歸吧 !
    大陸網譯WR7做走廊七星隊,好攪野 !
     

Leave a reply


Optionally add an image (JPEG only)