演劇女子部「タイムリピート~永遠に君を想う~」

啱啱(2019/1/19 00:32)睇完期待已久、上年9月公演、Juice=Juice主演嘅舞台劇「タイムリピート~永遠に君を想う~」。

而家呢一刻最強列嘅感覺係:個心好唔舒服。

好奇怪呢套舞台劇,我由頭睇到尾一滴眼淚都冇流過。但到謝幕嘅時候まなかん一行出嚟見到佢我個心好痛。之後出字幕嘅時候悲從中來… 望住啲字喊咗出嚟。

做咩會delay嘅?XDDD

好啦,唔劇透真係講唔到幾多感想,所以呢行以下會完全劇透喔!WARN咗㗎!同埋好耐冇寫過咁長嘅blog… 應該會有大量錯字同埋詞不達意嘅情況w 見諒m(_ _)m

==故事==

故事發生喺宇宙曆3255年,以人類為中心銀河連邦同以Mogi族(宇宙中嘅其他民族)為中心嘅Loa帝国正處於冷戰狀態。同時雙方喺度鬥快搵到含稀少礦物Neo Crystal嘅惑星,因為先搵到先著陸嘅一方可以得到喺嗰粒惑星嘅佔有權,亦都意味住會得到採礦嘅權利。

銀河連邦探測到一粒位於Orion座附近嘅惑星可能含有大量Neo Crystal,於是派出太空船エスペランサ号載住13個喺各方面有出色表現嘅年輕(?) 精英前往探索。13人當中對今次任務有重要作用嘅係礦物學家ルナ同宇宙物理學家ソーマ。相對於沉迷學問但好好仔嘅ソーマ,ルナ係一個又孤癖講嘢又有骨嘅女仔,有時甚至到咗挑釁嘅地步。佢喺度只係為咗工作,完全冇諗住要同一班搭埋同一條船嘅伙伴get along。

當佢哋接近目標惑星嘅時候,ルナ估計惑星嘅Neo Crystal埋藏量高達100億(總之就激多啦),為咗唔好俾Loa帝國捷足先登,佢哋需要快啲著陸攞咗個權利。因為如果資源被殘酷嘅Loa帝國攞到,又會係一場腥風血雨嘅戰爭,而且如果佢哋得到咁多資源,發生戰爭嘅話銀河連邦幾乎don’t stand a chance。

但係由於呢粒惑星嘅Neo Crystal含量好大,冇人預測得到礦石發出嘅能量會對太空船有咩影響,宇宙物理學家ソーマ覺得唔確定就要慎重一啲。但ルナ唔同意,覺得唔會有問題,因為Neo Crystal發出嘅energy同太空船嘅energy唔相沖云云。鑑於ルナ先係礦物學家而且係Neo Crystal嘅專家,加上大家都想快啲著陸攞到權利,Captain就下令繼續approach並準備著陸。(不過ルナ雖然係學者,但佢其實係軍方嗰邊推薦上船嘅,某程度上佢係會(要?)以軍方嘅快益為先,所以副Cap有擔心過佢嘅意見係咪中肯,不過被Captain話身為副Cap點可以講埋啲咁嘅嘢。)

但係ソーマ堅持覺得調查清楚啲好啲,始終載住成船人,於是走咗去醫務室搵因為頭痛喺嗰度食藥&休息緊嘅ルナ,勸佢唔好咁快下決定,反而俾ルナ串到一棟都冇,話佢係神棍科學家。ソーマ臨離開醫務室之前問ルナ,如果隻船出事,佢都會一齊死,難道佢唔怕?然後ルナ答ソーマ,佢從來冇覺得過活著有多好。

就喺呢個時候太空船響警號,突然發現一粒比太空船大3倍嘅小惑星要撞埋佢哋度,同時控制失靈,Captain發出最後求救不果,太空船撞上小惑星發生大爆炸…

TR1

大爆炸發生之後ルナ發現自己企返喺船倉入面,時間去返大概一個鐘頭之前佢地啱啱偵測到目標惑星有大量Neo Crystal嘅時候。ルナ望住眼前嗰班人講住一堆佢之前聽過曬嘅對白,除咗佢之外冇人記得自己死過。Captain同上次一樣問ルナ意見,但知道繼續approach會死嘅ルナ冇辦法好似上一次咁肯定地答冇事,吞吞吐吐唔知點答之際,Captain聽取咗軍方嘅意見繼續approach並準備著陸。(蝠註:話說呢次TR軍官叫ルナ佢有少少彷彿咁應嗰一句「はい…」可愛到我大叫♡)

ルナ立即出口阻止,仲話啱啱呢隻船同小惑星相撞全員死曬。副Captainジン就同佢講小惑星冇可能突然出現,如果有嘅話一定會預先偵測得到,何況咁大粒。呢個時候機關長(負責整備太空船嘅人)嘅エイジ話就算真係有小惑星,隻船都唔會控制失靈,因為佢check得好清楚。但係ルナ猛話會撞死曬全部人,Captain問佢點解,佢只係話佢經歷咗一次,全部人都覺得佢精神錯亂,但ソーマ出口請エイジ再慎重啲check多一次求個安心。Captain同意,同時命令ルナ去醫務室見一見醫生。

ソーマ於是扮帶ルナ去睇醫生,但其實捉佢埋一邊傾計。原來ソーマ做緊嘅研究正正就係關於Time Repeat。佢相信ルナ嘅說話,並開始分析佢嘅TR係點發生,因為TR必須要大量嘅能量加上奇蹟般嘅偶然先會發生,係非常微細嘅機率。呢個時候ルナ認為可能係大量Neo Crystal嘅能量加上太空船同小惑星相撞嘅時候發生嘅大衝撃令到TR發生,但令ソーマ不解嘅係點解只係得ルナ一個TR到。雖然ソーマ相信ルナ,但係佢哋已經唔夠時間去處理,於是ソーマ對ルナ講咗一個佢從來冇同人講過嘅身世秘密(佢係Loa帝國出身,因為爸爸被冠上背叛者之名全家被追殺,死剩佢一個逃亡咗去銀河系),叫ルナ如果再TR嘅話就同(到時嘅)佢講,咁佢會立即知道/相信ルナ係TR返嚟。

double check完返嚟嘅エイジ報告話發現安全裝置有幾條cable甩咗,所以有幾項安全系統關閉。エイジ話如果因為咁有virus入侵嘅話,操控失靈係可能會發生。好彩發現得早,及時fix返。今次同樣有謎之小惑星出現,但因為控制冇問題,佢哋成功避過衝撞。當大家以為得救嘅時候,佢哋發現謎之小惑星竟然好似生物咁偏離軌道追住佢哋嚟撞,無論佢哋點避都冇用。ルナ開始覺得呢個係佢哋嘅命運,無論點都改變唔到,但ソーマ就叫ルナ相信佢,下一次唔會俾佢一個人面對。最後太空船都係撞咗,又大爆炸。

TR2

ルナ又再一次返翻大概一個鐘頭之前,又係一樣嘅情況一樣嘅對白。今次ルナ選擇第一時間同曬全部人講將會發生咩事,大家都唔係好信,但平時硬朗嘅ルナ講講下講到喊,令大家覺得事態嚴重又好擔心佢。

呢個時候ソーマoffer陪佢去醫務室,其實係想同佢單獨對話。當ルナ按照約定想同ソーマ講佢知道佢嘅身世秘密嘅時候,ソーマ好興奮咁同佢講佢都有上一次嘅記憶,佢今次同ルナ一齊TR咗返嚟。佢認為係因為上次大爆炸嘅時候佢拖住咗ルナ隻手。有咗上次嘅記憶,ソーマ開始同ルナ分析點解粒謎之小惑星會跟住佢哋,因為小惑星照理只會跟住軌道走。諗咗幾個假設之後,ソーマ開始懷疑其實有冇粒咁嘅惑星,覺得可能係雷達顯示出現問題,就走咗去check log。

喺ソーマ去做嘢嘅期間,其他crew逐個走嚟關心ルナ,令ルナ發現佢其實唔係孤單一人,慢慢對其他人打開心扉,尤其係對通信士嘅ツグミ,覺得佢好似老朋友咁。佢同ツグミ講,佢爸爸去世之後,佢媽媽好似變咗另一個人咁,每一日都打佢。但係佢依然係咁鍾意佢媽媽。直到佢5歲生日當日,佢媽媽拖住佢帶佢去街,佢好開心同媽媽拖住手去玩,點知媽媽帶咗佢去孤兒院,叫佢喺嗰度等佢,就放開手將佢留咗喺嗰度。ルナ一直喺度等佢媽媽返嚟接佢,但佢冇再見過佢媽媽。因為佢媽媽拖住佢係為咗遺棄佢,所以ルナ唔鍾意同人拖手,唔再去相信人。(蝠註:點解まなかん成日都演孤兒…)

check完backlog返嚟嘅ソーマ發現顯示真係俾人搞過,被外部插入咗一啲影片,佢懷疑就係嗰粒小惑星嘅雷達影片。ルナ同ソーマ講,佢前兩次已經覺得機關士(機關長エイジ條靚)テル有古怪,佢有一段時間唔見咗人,返嚟話去咗廁所,但係同時間都去咗廁所嘅エリー冇撞到佢。全員追問之下テル承認自己收咗錢喺main computer插入咗啲data同埋整停咗個安全系統。ソーマ分析出嚟嘅結論係,有人叫テル做手腳令到太空船誤報會撞小惑星,但其實根本冇小惑星,反而係呢隻太空船本身有炸彈,撞小惑星嘅影像只係為咗令之後調查嘅人以為佢哋隻船爆炸係因為小惑星事故,藉此隱瞞有炸彈嘅事。而會做出啲咁嘅事嘅,只有佢哋嘅敵對:Loa帝國。

因為唔知炸彈喺邊,佢哋只能以手上嘅資料推斷テル插入嘅data入面有引爆裝置,因為如果爆炸嘅時間同影片中小惑星嘅撞擊時間唔一樣嘅話,咁佢哋做嘅手腳就冇意思。但副Cap check過之後話搵唔到引爆用嘅data。即係話就算而家拆咗影片data落嚟,個炸彈都會定時爆炸。全員各自去檢查自己負責嘅部份,但係都係搵唔到個炸彈。佢哋嘅太空船越嚟越接近目標惑星,炸彈隨時要爆… 但今次ルナ同ソーマ叫大家拖手,希望藉此一齊TR,但最後肯相信佢兩個而拖手嘅係只有副Capジン、醫生マドカ同機關長エイジ。

TR3

成功TR嘅5個人製造藉口去到醫務室從長計議,多咗人多幾個腦可以做嘅嘢多咗。ジン話今次由得テル插data,睇住小惑片嘅假雷達佢哋可以準確啲知道個炸彈幾時爆。同時ルナ認為data入面冇引爆data代表呢隻船上面有Loa嘅間諜。雖然唔想懷疑伙伴,但的確有呢個可能性。為咗要搵出邊個係間諜,醫生マドカ話有一種藥係可以令植入咗喺間諜身體內嘅隱形晶片現形,再通過感應器就可以搵出邊個係Loa嘅Spy。マドカ再補充話其實佢之前有同Captain講過不如全員check一次,但Captain以唔想懷疑伙伴為由拒絕。於是マドカ呃㕑師リョウ放咗啲藥入食物入面,然後TR嘅5個人研究check邊個先,ルナ就話覺得Captain有古怪,佢話每一次爆船之前Captain都好似好surprise咁講咗句「點解!」,加上佢拒絕咗マドカcheck晶片嘅提意,ルナ懷疑間諜會唔會就係Captain,因為唔知道原來自己嘅任務會引爆隻太空船所以最後問點解。

當大家都興致勃勃要Spy hunting嘅時候,ソーマ覺得唔係咁好,而且somehow佢覺得嗰個間諜就係受害者(蝠註:呢一句話蝠覺得非常重要),佢覺得就算真係有間諜,Loa帝國大概冇講佢知真正嘅任務內容。ソーマ話佢自己係亡命者,佢好清楚Loa做事嘅手段,佢哋經常會欺騙對方令對方相信,然後毫不猶疑地背叛。ソーマ提意不如同全部人講出真相,間諜知道被Loa欺騙可能會自己報上名來,並協助佢地脫險。但對被最親嘅人背叛過嘅ルナ嚟講,要佢簡單地相信人實在太難。

喺呢度補充一個劇中冇講嘅設定:ソーマ個爸爸喺佢細個嘅時候被屈係間諜,佢睇住軍人用(做咗手腳嘅)探知機scan佢爸爸,之後被押走,所以ソーマ對呢個做法好反感。

ソーマ同ルナ講,佢知道ルナ其實內心好想相信人,因為佢好想被相信。佢好想去愛人,因為佢好想被愛。咁講當然被ルナ否定話佢嘅嘢佢知條鐵咩,但係ソーマ就肯定咁話佢知道,因為佢感覺到自己同ルナ好相似,佢講嘅嘢從來都冇人聽有人相信,但佢用咗同ルナ唔同嘅approach,佢首先去相信別人,希望人哋都會同樣相信返佢。

但最後ルナ都係冇聽佢講,雖然個心明顯地被動搖。佢哋check咗佢哋覺得最可疑嘅Captain,證明咗佢嘅清白。知道咗佢哋喺度搵間諜,船上嘅兩個軍人本來打算武力解決,但被ルナ阻止。佢同ソーマ同大家解釋,佢哋認為間諜都係被騙,唔知會引爆隻船,佢哋以為忠心為Loa帝國效力,但實際上佢哋係被背叛同遺棄嘅一群。

講下講下time up XDD 知道今次解決唔到,於是ルナ叫大家今次要全員拖住手一齊TR。雖然有人唔信又唔係好願意,但ルナ話佢唔想佢哋死,想同大家一齊活下去。(呢句話好關鍵… 首先同佢開頭唔怕死有好大分別,再者對後面嘅故事都有重大意義)

勸服大家拖住手,太空船再一次爆炸。(蝠註:最後Captain話雖然佢唔知發生咩事,但佢相信ルナ嗰度我感動到死咗>__<)

TR4

今次全部人都死過一次TR返嚟,有之前嘅記憶,ルナ就直接開口問Captain佢嘅疑問:究竟佢每次爆炸之前嗰句「點解」係咩意思,佢係發現咗啲咩所以咁surprise?原來佢最後搶咗ツグミ部電腦求救嘅時候,發現通信士嘅ツグミ發出去嘅暗號有問題。然後場內最驚訝嘅係ルナ。佢最唔相信(定係最唔想相信?)最溫柔最善良嘅ツグミ就係佢哋喺度搵緊嘅間諜。Captain發現ツグミ向師令部發出嘅暗號係「ニイタカヤマノボレ」,銀河連邦內呢個暗號係代表「搵唔到目標惑星」。Captain問ツグミ嘅時候佢只係話自己打錯咗,但船上嘅軍人當然唔信,佢話通信嘅時候有好多人包括Loa帝國都收到,佢認為呢個暗號對Loa帝國嚟講係咪相反意思嘅「搵到目標惑星」。

Captain阻止咗軍人繼續審問ツグミ,話件事由佢嚟處理。ツグミ答應佢會講出一切,但想去洗個面先。Captain選擇相信佢由佢去(蝠註:WTF?!),結果ツグミ匿埋咗,雖然喺太空船走唔甩,但冇人知佢去咗邊。(蝠註:咁嘅,我明白佢想相信佢嘅隊員到底,但明知佢係spy都放生佢係咪有少少…)

呢個時候ルナ推測如果テル插入嘅data入面有探測Neo Crystal石英波嘅裝置,收到目標惑星發出嘅大量石英波,當石英波數去到某一個數字嘅時候自動啓動偽小惑星影片,同時啓動倒數30秒自動引爆炸彈,就可以做到意外嘅效果。所以只要太空船接近目標惑星,就必定會出事。

要確認最好當然就係問間諜嘅ツグミ。原來ルナ有ideaツグミ去咗邊。喺第2次TR嘅時候ツグミ同ルナ講過佢發現咗一個地方冇乜人去,佢唔開心嘅時候會去嗰度大嗌發洩。ルナ估計佢會匿埋嗰度,就同ソーマ講叫佢準備藥同探知機之後去嗰度搵佢地,ルナ想清楚知道ツグミ係咪真係間諜。

去到ツグミ匿埋嘅地方,ルナ見到佢揸住一隻介指。ツグミ同佢講呢一隻介指係Loa帝國軍配給俾佢用嚟delete自己嘅記憶。所以就算捉到佢點被拷問都唔會有答案。佢同ルナ講佢真係唔知隻船會爆,ルナ問佢任務係咩,佢話佢嘅任務只係喺發現惑星之後佢會發出暗號,之後另一個人就會去破壞著陸系統令太空船著陸唔到,呢個時候Loa帝國軍會先著陸搶走佔有權。(蝠註:睇到呢度蝠心諗,間諜你都幾funny… 問兩句就自己講曬出嚟XDD 點解原來…>__<)

喺言語之間ルナ發現重要事情:就係船上面仲有另一個間諜。ルナ追問佢:「呢隻船上面有另一個問諜?」,然後ツグミ一句:「你喺度講咩呀」(蝠註:佢呢一句嘢令我起曬雞皮,因為呢一句話代表ルナ忘記咗一啲ツグミ知道嘅嘢… 而ツグミ係spy… so… 唔怪得佢乜都講啦!

ツグミ話俾ルナ知佢就係「另外嗰個間諜」,仲叫佢做ハンナ,話呢個係ルナ嘅真名。ルナ完全shock咗,ツグミ再補充話佢途中已經覺得ルナ有少少奇怪,但任務中又唔可以同佢接觸。ツグミ話佢真名叫エマ,同ルナ兩個喺Loa帝國嘅孤兒院一齊長大,情同手足。但係無論ツグミ點講ルナ都係唔記得佢講嘅嘢。呢個時候ツグミ終於明白ルナ嘅記憶被Loa帝國篡改過,只係被媽媽送去孤兒院嘅記憶太強所以只有嗰一段深深印咗喺佢腦入面洗唔走。呢個時候ソーマ帶住藥同探知機嚟到,啱曬啦,ルナ即刻叫ソーマ俾啲藥佢,佢想知自己係咪真係Loa帝國嘅間諜。結果?當然係中咗啦!

ツグミ話佢有聽過Loa帝國入面有一種間諜嘅記憶會被修改,為咗佢哋做任務嘅時候唔會因為驚或者私人感情而猶疑。然後ツグミ捉住ルナ用佢手上嘅介指鏗咗佢個頭一下。佢手上嘅介指唔只可以刪除記憶,仲有個功能係回復記憶(蝠註:哇,咁方便ww)

借個位補充少少劇中冇講嘅設定:ルナ(ハンナ)同ツグミ(エマ)嘅嗰間Loa帝國嘅孤兒院係類似spy嘅養成所咁嘅地方… 喺嗰度係孤兒會被洗腦教育為帝國效忠。好變態… who knowsルナ同ツグミ喺嗰度經歷咗啲咩… 可想而知佢被回復記憶嘅時候會有幾shock…

回復本來記憶嘅ルナ記起係佢自己自願參加呢個任務,而呢個任務係將一個高性能嘅炸彈植入體內,然後上敵人嘅太空船。佢正正就係喺呢隻太空船上面嘅炸彈。(蝠註:明明一直想辦法去救大家,但原來自己喺度嘅話根本冇得救… 嗰種心情…>__<)

突然成件事都合理曬:點解係ルナ有TR能力?因為隻炸彈由佢體內爆發,能量喺由佢身上發出!點解佢成日頭痛?因為個炸彈植入咗係佢個腦入面!

ソーマ向佢提意再TR嘅時候唔接近目標惑星就唔會觸發到個炸彈,但ルナ只係多謝咗佢一聲,推開咗佢。下一次,佢打算自己搞掂件事。但臨爆之前ソーマ再一次捉住佢隻手要同佢一齊TR。

TR5

今次得返ルナ同ソーマ兩個TR,其他人也都唔知。ソーマ極力阻止,但ルナ堅持無問題,話嗰粒惑星係大家嘅未來,係未來嘅希望,無論要犠牲乜嘢銀河連邦都要攞到手。Captain聽取ルナ意見,繼續approach。

ソーマ追問ルナ點解唔阻止隻船approach或者阻止ツグミ發暗號俾帝國。ルナ答佢帝國唔會得ツグミ一個消息源,一定會有兩手準備。佢記返起曬所有嘢… 佢被植入嘅晶片入面都有探知系統,比ツグミ更早已經自動將資料傳咗俾帝國。所以已經冇得返轉頭,佢哋只能繼續approach,並且要先著陸得到佔有權。ソーマ話但係接近目標惑星嘅話會爆炸,ルナ同佢講佢有辦法。雖然ルナ唔講,但ソーマ點會唔知佢想點?ソーマ捉住佢,話我答應過你會一直喺你身邊,ルナ望住佢,答咗一個:「我今後都會一直同你一齊。一直,永遠地。」(蝠註:個心好寒呀聽到呢句orz)

然後大叫ソーマ放手,令大家以為ソーマ襲擊(?)佢,大家捉住ソーマ之後ルナ自己一個走咗入逃生倉,按制彈咗自己一個出去。發現唔妥嘅大家打開咗逃生倉嘅視像通話。由於逃生倉係冇著陸裝置,ルナ咁樣彈咗出去,因為同惑星嘅距離近,好可能會被惑星嘅引力扯咗過去,直接墜落。佢哋嘗試回收個逃生倉但唔成功,ソーマ叫操控士追佢,但ルナ阻止咗。佢叫大家唔好追佢,佢唔可以同大家一齊。

然後,佢同エマ(ツグミ)講,話佢唔適合做呢種工作,遲早帝國都會放棄佢,叫佢保重。(←蝠註:好心酸…T___T 但あーりー嗰句「エマ是誰啊!」我爆笑咗w)

ソーマ好想救佢,發曬茅咁話自己要坐逃生倉追出去,但ルナ已經封咗佢嘅後著,一早就停曬其他逃生倉。

最後,佢同ソーマ道歉,話只有用呢個方法先可以救到大家。最後ルナ同ソーマ嗰段說話我簡略唔到… 只能全段放出嚟:

私はずっと、死ぬことなんて恐れてなかった
(我以前從來都唔怕死)

生きててよかったと思うことなんて一度もなかった
(一次都未覺得過活著多好)

仲間とか、信じるとか、愛とか、そんな言葉も大嫌いだった
(咩伙伴、信賴、愛… 我最憎就係呢啲詞)

そんなの信じたって裏切られるだけだって
(相信人結果只會被背叛)

そう思ってた
(我一直都係咁諗)

だから、カミカゼドナーに志願した
(所以我先會自願參加人肉炸彈任務)

でも今は違う
(但係而家唔同啦)

私には仲間がいる 信じる人がいる
(我有伙伴,亦有我相信嘅人)

そして愛する人がいる
(仲有我愛嘅人)

ソーマ、あなたは無事に惑星に上陸する
(ソーマ,你會平安著陸惑星)

そして、タイムリピートを実証する世界で初めての科学者になる
(然後成為世界第一個證實到Time Repeat嘅科學家)

ソーマ、あなたならきっとできる
(ソーマ,我知你一定會做得到)

私は決めたの
(我決定咗)

私は、今のあなたとは違う時の流れを生きる
(同而家嘅你喺唔同嘅時間軸活下去)

目覚めると、あなたと再会して、必ず同じ結末にたどり着く
(當我再次醒返嘅時候,我會同你再見,然後保證結果同今次一樣)

悪い夢をめぐり続ける
(我會不斷同惡夢再會)

今のあなたとは永遠に交わることのない時の流れのなかで
(喺同你永遠都唔會再有交流嘅時間軸裡面)

ソーマ、ありがとう
(ソーマ,多謝你)

私は、永遠に、あなたを(想う)
(我會永遠想著你)

太空船最後如ルナ所說,成功地在目標惑星著陸。銀河連邦取得佔有權…

劇終

==感想==

呢套舞台劇,蝠少有地預先知道咗基本劇情同埋結局。因為有朋友去咗睇,蝠擋不住誘惑叫佢劇透曬俾我知orz 而且我當時諗,第1我比較唔係太喜好世界觀太大規模嘅舞台劇(such as this one),第2我覺得汁汁啫,冇所謂(喂w),第3我覺得H!P最近好多套都係straight forward嘅劇情,知道都唔會出事,鬼知咁啱呢套係有少少推理,個ending係要surprise架啫?XDD

所以我聽咗劇透有無後悔?Err… 係有少少。我有諗過如果我完全唔知發生咩事,跟住個故仔被shock我會唔會更有feel… 事實上第1次睇到故事完我都唔識喊我有覺得如果唔係知道咗應該會更震憾… 雖然原來唔關事,只係delay咗XDDD in fact,我因為寫呢篇blog睇第2次嘅時候係喊死咗,再之後睇幾次都爆喊。原來delay啫又係ww 而且我stand beside樓上第2論點,覺得反正都係汁汁啫,安全安心安樂嘅汁汁,so far咁多年睇咩都冇中過,睇來睇去咪又係かりん!點都唔會出事架啦!OK… 我認當時我咁諗的確係唔記得咗一樣重要嘢…

Anyway,劇嘅整體感想。

完全冇令我失望… 好好睇…orz 雖然太SF嘅話我會興趣弱少少,但呢個故事… 我好鍾意呀!背景係SF,內容其實都冇乜太誇張嘅SF嘢,主要都係希望/內心變化/推理/犠牲… 好正~ 蝠鍾意到好想一巴星死當時一秒都冇諗過要去睇嘅自己XDDD 因為實在係… 好睇過我12月去睇アンジュ嗰套咁嘅死人アタックno.1。

故事開頭掉咗幾條都幾大條嘅伏線出嚟,蝠最鍾意睇收伏線XDDD 同埋given我知道故事大概發展,睇到中途都會好緊張實在係劇嘅節奏做得超好。如果喺現場真係唔係話「睇」咁簡單,而係同佢哋一齊經歷!我睇DVD都有咁嘅感覺,現場一定好正。另外我好鍾意最後出嚟謝幕嘅時候成員都仲係浸住喺自己嘅角色入面。唔會嘻嘻哈哈咁走出嚟(我唔係影射緊アンジュ!!ww),まなかん謝幕時嘅表情… 心都爛埋orz

但係真係好sad… 點解會諗到啲咁sad嘅故仔orz 如果最後ルナ係彈自己出去死,成件事會完結嘅話,嗰下絕望感真係冇咁強烈。佢而家係要永遠冇限loop,死到天荒地老。諗下都心寒… 今次呢個故事嘅絕望有少少remind我リリウム裡面最後リリー嘅嗰種絕望。唯一唔同係ルナ係帶住「今次呢個時間軸嘅ソーマ」嘅愛,同埋佢可以繼續見到ソーマ,咁諗嘅話係比リリウム好少少。但我又會諗,如果ソーマ冇打開ルナ嘅心扉,冇令佢愛過,佢會唔會冇咁痛苦。但係ルナ最後同ソーマ講多謝,我assume佢慶幸自己有愛過有被愛過。但係真係好sad… 而家蝠覺得嘅嗰種個心唔舒服嘅感覺呢… 好似嗰時睇完Stacys嘅感覺。

係,我睇完汁汁呢套舞台劇,個腦彈出嚟嗰兩套係Stacys同リリウム,就知道呢套有幾淒慘…

睇完套劇之後蝠一直都喺度諗有冇辦法可以救到ルナ… 例如唔知佢可唔可以用其他方法死呢?咁樣起碼個炸彈唔爆嘅話冇咗TR需要嘅能量,佢可能可以死最後一次唔洗永遠loop嗰一個鐘頭無限死>__< 比如消極啲如果ルナ用一啲唔洗爆嘅方法自殺,咁可唔可以了咗件事?定係佢一死個炸彈就set咗會爆?我覺得TR多幾次嘅話ソーマ會諗到其他方法試。不過可能ルナ唔想大家再死咁多次… 寧願自己一個無限死… 定係可以不斷見返ソーマ都係一種幸褔?

雖然明白ルナ大概係覺得自己有責任,想自己一個攬曬上身,同時想保護伙伴們同佢愛嘅人。但如果我係ソーマ,我會寧願拖住佢陪佢無限loop… 唔會想佢一個人承擔曬…>__< 我相信劇中嘅ソーマ都係咁諗㗎!只不過ルナ唔俾佢咁做咋>__<

至於音樂,我唔算係全部都好鍾意,但基本上都算好聽。但都有特別鍾意嘅!首《永遠に君を想う》真係好好聽,唔只係有人唱嘅部份,佢有段好長嘅intro,嗰段intro嘅鋼琴?好好聽… 同埋又睇咗套劇呢… 首歌最有feel… 歌詞好正啊… 尤其係開頭まなか嗰段…

硬く閉ざした扉の向こう(緊緊關上嘅門後面)
ヒザを抱え泣いてた私を(我攬住膝頭喺度喊)
あなたはそっと手を掴んで(係你輕輕捉住我隻手)
日の当たる場所へ連れ出してくれた(將我帶到陽光底下)

知道ルナ背境再聽到呢啲咁嘅歌詞… 完全會淚線崩壞好不好…orz

《まるで》都好正~ remind我こぶし嘅《サバイバー》嘅開頭… 嗰種一聽有點寒嘅感覺…

蝠新發現係かりん同まなか把聲好夾… 佢兩個把聲我本來都鍾意,但兩把聲一齊出嘅時候呢,唔知點解我有種まなか把聲包住咗かりん把聲嘅感覺。而本身かりん把聲好通透,所以被包住咗都好出,成個音場好smooth好靚… 聽下《運命》就知我講咩。

另外,蝠好鍾意かりんsolo嗰首《君と僕は》… 可能我渴咗かりん嘅solo好耐… 蝠係真心鍾意かりん把聲(呃,唔係淨係把聲啦!XDDDD)

好,到談個別成員。Err… 原諒我冇興趣冇乜留意嘅成員唔寫啦!

ルナ:稲場愛香

第一眼見到poster,睇size就知佢係主角嘅時候,個心閃過咗半秒:啱啱入汁汁就主角。但係佢抵做主角呀!!佢演戲嘅模式有少少似どぅーさん架我覺得,佢係全部精神全副感情都入咗個角色度。有啲表情、小動作唔係話可以有意識地演出嚟。所以佢完咗場先會崩潰,因為ルナ已經入咗細胞。之前睇演劇女子部「気絶するほど愛してる!」都已經咁覺得… 佢同ちぃ嗰個最後嘅電話,同今次ルナ對ソーマ講嘅嗰段臨別嘅說話… 都係慘到唔知點形容。佢喺台上面嘅一舉手一投足… 每一個表情… 都完完全全就係ルナ。話說一開始提過嘅感情delay… 其實已經唔係第一次發生喺まなかん相關… 我睇返自己寫嗰篇「気絶するほど愛してる」感想先知原來上次都係咁囉!睇第2次先識喊XDD

上次嘅角色同今次嘅角色咁啱都係孤兒,而ending呢,咁啱又係佢犠牲自己去成全他人… 雖然規模完全唔同,但做嘅嘢係一樣囉。但又講返,まなかん演呢類係有一手。我… 中曬囉。以會寫小說/故事嘅人嘅角度去睇,まなか係一個幾會觸發靈感嘅人,大概係佢本身都係一個好感情豐富嘅人。

今次呢個角色呢,佢係需要喺相當短嘅時間由一個對所有人都好冷酷嘅人(喺佢被刪除嘅記憶中,佢甚至係一個覺得冇生存意義,自願去做人肉炸彈嘅人…),發現自己唔孤單,再變成有血有肉有感情嘅人。我覺得佢handle得唔錯呀,一開始嗰個ルナ同最後嘅ルナ… 眼神都完全唔同曬… 重點係佢做得好smooth,順住個show睇件事好自然咁發生。但係我睇完ending睇返開頭嘅screenshot我認我嚇咗一跳!仲有呢,佢今次成件事我都真係好鍾意。由設定、背境到造型都中曬紅心。咩事啊~ 揹住個ipad(?) 走來走去會唔會太可愛呀!

美中不足嘅係,收錄呢隻DVD嘅時候佢喉嚨已經出咗問題,沙沙地咁… 唔係佢本身聲底嘅沙…(不過真係好desperate嘅話我會去聽soundtrack止咳,好少少!)。因為我本身幾鍾意佢唔用力嗰把聲,因為佢嗰把聲好有故事感。我而家聽緊soundtrack… 好入心入肺嘅歌聲啊~~!!上次「気絶するほど愛してる」佢有首歌同きしもん唱有一期我又係non-stop咁repeat。嗰時佢把聲清好多…!不過今次呢,暫時我唔敢賴汁汁整傷佢XDDD 如果佢留耐啲先出事我實話汁汁有問題XDDD 因為汁汁爛喉嚨記錄不良XDDD 不過講返正經… 佢本身都成日故障… 快啲好返呀,好想聽返佢把靚聲。

蝠覺得まなかん係而家H!P入面適合舞台嘅一群,我甚至覺得佢有どぅーさんlevel嘅天份。どぅーさん走咗之後嘅H!P我除咗かみこ之外冇特別想睇邊個演戲係因為真心覺得佢演到我覺得痛,除咗まなか。仲有我覺得佢啱舞台劇係佢講對白清楚到我聽得好舒服。上面默出嚟最後嗰段嘢… 一take KO。

雖然唔係好關今次呢套舞台劇事,但係我想講… 2年前第一次睇まなか演舞台劇,想開始deep dig嘅時候佢已經離開咗カントリー・カールズ。有種未開始就結束嘅感覺orz 今次睇完… 唔知點解即刻去睇汁汁個blog望下佢。明明知道佢喺度(因為雖然蝠唔睇汁汁,但一直都有用望遠鏡留意住佢w),但仍然忍唔住要double confirm XD 陰影嚟㗎,冇辦法XD

ソーマ:宮本佳林

公演嘅期間かりん話過佢愛上咗ソーマ,搞到我一直好有興趣知道ソーマ係點樣嘅一個人,睇過之後… 嗯,係幾可愛嘅呢個男仔ww 應該又未到天才科學家嘅地步,但知識量超豐富,少少怕醜少少內向(?) 但對學問有堅持有理想… 同埋… 講嘢激快XDD 佢後尾全力想保護自己愛嘅人嘅時候真係好正,唱《君と僕は》嗰時真係好吸引… 一個好溫柔得嚟信念好堅定嘅男仔。最可惜係保護唔到囉orz 好sad呀真係。尤其係ジン之前話ソーマ只係對學問有興趣,難得佢搵到佢愛嘅人…

hmm… 至於かりん嘅男角… 我覺得OK啦。given作為どぅーさんfans對演劇女子部嘅男角要求比較高少少。話說上面話完まなか講對白清楚,かりん呢個ソーマ又快又一執執又大段!不過絕妙之處係… 又唔會聽唔到喎!係咪好神呢!かりん,勁呀!你點做到架!XDDDDD

睇かりんblog知道佢今次呢個角色摸索咗好耐。的確今次呢個角色唔易… 世界觀又大,ソーマ嘅背景真係唔係一個20歲嘅女仔可以感受到,加上汁汁好耐冇演過舞台劇,突然演呢套係難度高㗎!不過我覺得係佢先做到呢個效果嘅ソーマ,而我好鍾意呢個ソーマ~ 所以… かりん,ありがとう!

アリサ:宮崎由加

今次演Captain嘅leader,平時蝠少留意汁汁,當中更加少留意佢。但今次睇佢做呢個角色覺得佢好有坐陣感。做得好好,個角色好適合佢!

ジン:金澤朋子

一句:好型呀大佬!!!!

エイジ:高木紗友希

我係對高木冇乜好感,但我覺得我唔係針對佢!成套劇佢啲扮到好man嘅動作都好奇怪囉好冇?好作狀呀喂… 阿姐你第幾次做舞台劇呀…

リョウ:植村あかり

個角色其實都… 幾垃圾。雖然未睇已經知佢個角色配角到一個點,但真係估唔到咁廢。but佢有一幕我好鍾意嘅係,エイジ喺度類似諷刺ルナ,リョウ企出嚟叫佢收聲我覺得好正。另外佢嗰句「エマって誰!!!」我諗返都覺得好笑。

ツグミ:段原瑠々

るるちゃん今次都叫做幾key嘅角色,我個人覺得… 收貨啦… 勉強。given佢真係成日要同まなかん做對手戲,相比之下一定蝕㗎啦冇得好講。但係第一次舞台劇… 都可以啦我覺得。

レオナ:高瀬くるみ

一句:不愧係高瀬…!!

以上!!\(^O^)/

PS. 話說雖然得兩句,但讀白係しゅうさん我好high呀!!!勁愛しゅうさん呀!!

Share on FacebookShare on Google+Tweet about this on Twitter

14 Responses to 演劇女子部「タイムリピート~永遠に君を想う~」

  1. 完全無諗過套劇咁sad..
    本來入得黎睇劇透都無諗住短時間內會開呢套
    但係而家覺得唔睇的話會錯失好多

    “悪い夢をめぐり続ける
    今のあなたとは永遠に交わることのない時の流れのなかで”
    呢兩句我睇字都覺得心寒+心痛
    可能因為最近睇左套美劇,所以有啲代入感
    (某種意義上同JJ呢套又少少相似,都係講一個悲劇角色,佢個惡夢發極都唔完,只會愈陷愈深orz)
    這種Bad ending之中的相對Happy ending反而另人更難以釋懷

    • 真係sad到離曬譜…
      我想話而家我去到一個位係暫時唔敢再睇住…
      星期五第一次睇完星期日再睇,然後尋晚睇… 我係一次比一次崩潰…

      Bad End從來都比Good End深刻,
      蝠絕對唔抗拒Bad End,心痛一向係養分(喂w
      只係有時會睇到個人好灰orz…

  2. 終於可以清楚知道全個故事,感謝~
    另外感謝你呢篇Blog其中一幅圖係由加~
    .
    不過你只係一句就帶過Cap同副Cap嗰段對手戲,
    到底佢兩個係乜嘢關係?

    • 邊段?佢去check spy嗰段?

      ルナ懷疑Captain,但副Cap就話唔會。呢個momentエイジ話副Cap係因為「私人感情」而否認。於是副Cap就搶咗支嘢去求個明白。
      去到見到Captain,Captain見到支嘢問佢地做乜明明佢話唔俾驗spy喺度會揸住支嘢。副Cap就同Captain講佢好尊敬佢,話會跟佢一世,無論佢係唔係spy都好,佢都咁尊重佢。之後Captain由佢驗,驗出唔係,副Cap就好激動咁攬住Captain話我地要一齊活著返去。Captain大概發現在副Cap對佢有啲意思w 於是就話:「係呀,我老公同細路都等緊我返去。」XDD

      PS. 張圖你真係唔覺得我係望住後面嘅ルナ嚟Cap??XDDDDDd

    • 係呀!就係呢段喇!
      難怪好多人都笑,原來由加係講緊”我”同細路等緊佢返去~ XD

      PS. 張圖你真係覺得我會留意到後面嘅ルナ??XDDDDDd

    • 係呀,你同兩個細路呀!XDDD

      PS. 係你啱!!!XDDD 但佢返到去係因為ルナ呀!!(其實返唔到去都係因為ルナXDDD)

      順便一句:leader畢業應該係6月中~尾喎。6月11號之後嘅事。到時你要FC抽飛嗎?

    • 我無所謂,武道館山頂最後一行正中間坐過,死角席都坐過,
      如果你可以合二為一,抽到死角席的山頂,那就真的無話可說了~

  3. “一次比一次崩潰”
    事關你都同ルナ一樣TR左好多次 = 見住佢逃不過命運好多次 T^T

    “這種Bad ending之中的相對Happy ending反而另人更難以釋懷”
    我打多左”相對”2粒字w
    其實我想講無絕對嘅Bad ending,今次對大局或者某D人黎講都應該係個Good end
    而某程度上ルナ都確實享受過Happy,但事實上佢一生都好悲劇
    額這種Bad唔晒但又好慘嘅結局真係搞到人好灰好down…..

    • 不過呢… 我覺得呢個結果唔係命運而是ルナ嘅選擇…
      由頭到尾其實都係佢嘅選擇,由舉手做人肉炸彈開始,到決定救ソーマ佢地…
      但我係想陪佢一直loop… 就好似我話唔介意陪ファルス3000年… 如果有命嘅話XDDDD

      Bad唔Bad係主觀嘢,比如其實我可以覺得Bad,
      但係你可以覺得唔Bad,所以呢個好難講。
      甚至係我睇到ルナ咁我覺得Bad,
      但可能ルナ唔覺得係太Bad都唔出奇。
      不過就係Sad囉…

Leave a reply


Optionally add an image (JPEG only)