戀上地獄少女

係. 又講地獄少女. 但係點解今次唔係入さゆり個分類? 因為今次的確唔係好關佢事. 我戀上嘅, 係呢個地獄少女:

無錯, 係真係動畫版嘅地獄少女.
最近我睇返晒所有地獄少女嘅動畫同埋漫畫. 我本意係去了解多dさゆり做嘅角色, 但係, 竟然係愛上呢個動畫人物. 當然, 我係因為さゆり而睇. 而我真係好感激さゆり”介紹”咗嘅佢俾我.

地獄少女個名叫閻魔あい, 佢係負責幫人消除怨恨. 如果你有怨恨, 你就可以响凌晨0時上去”地獄通訊”嘅網頁, 輸入你怨恨對象嘅名, 地獄少女就會出現. 佢會交一個人偶俾你, 個人偶頸上有一條紅繩. 只要你解開果條紅繩, 你就會同地獄少女建立契約, 你嘅怨恨對象就會被地獄少女送入地獄. 但係, 立咗契約之後, 你死後就都會落地獄.

(以下內容會爆咗地獄少女嘅身世, 好可能會影響你睇呢套動畫嘅時候嘅娛樂性. 如果你打算睇呢套動畫, 你可能會想skip咗以下呢一part)
而點解地獄少女會變成地獄少女呢, 就係响好耐好耐好耐以前一個小村落入面, 有一個習俗, 就係每7年就要搵一個7歲嘅小女孩做活祭品獻俾山神, 祈求風調雨順, 農作物豐收. 咁唔好彩, 要獻活祭品果年, 小あい啱啱7歲, 而一向唔受歡迎嘅佢俾選為活祭品. 本來死梗架啦, 但係佢父母錫佢, 唔想佢咁細個就要死, 所以就叫咗一向好錫小あい嘅表哥仙太郎去救佢. 仙太郎答應咗, 救咗佢之後收埋佢响山上面, 每日送食物俾佢同陪佢傾計. 平安無事地過咗6年, 但好景不常, 6年後有一日, 終於有人發現咗小あい未死. 就將呢6年農作物失收歸咎於あい, 於是捉佢出黎, 將佢同佢父母一齊活埋. 而村民都要仙太郎落手活埋佢. 而一心以為仙太郎會救自己嘅あい見到, 就好失望好憤怒, 流出血眼淚, 而眼睛變紅色. 活埋咗佢同佢屋企人之後, 仙太郎好唔開心, 就決定離開條村. 佢離開嘅時候, 條村著晒火, 而仙太郎見到あい响條村度行來行去. 就係咁, あい毀咗條村, 殺死晒d村民. 就係佢嘅仇恨, 令到佢上唔到天堂, 輪唔到迴, 連地獄到去唔到. 所以佢要成為地獄少女, 不斷為人消除怨恨黎洗刷自己嘅罪孽. 大大話話都做咗400幾年, 永無止境…

而因為呢個過去, 地獄少女一般都無乜表情, 佢封閉咗自己個心, 對自己嘅事唔多理. 有一集佢俾人打, 佢都可以唔理. 佢一般唔會為咗自己嘅事而開心或者唔開心… 但係如果佢發起火上黎, 真係唔係人咁品. 佢癲起上黎都幾恐怖下, 乜人講野都唔聽(第一季最後果幾集).

我呢, 就响睇咗5,6集動畫之後真正愛上咗地獄少女閻魔あい. 咁鐘意一個動畫人物, 真係我嘅第一次. 不過我不嬲都對”地獄”呀, “惡魔”呀, “吸血鬼”呀, 呢類title嘅事物有興趣. 而當初開始睇真人版地獄少女都係因為個名. 不過呢套野真係幫我開發咗好多野… 勁呀. 多謝你呀, 閻魔あい!!!

(有機會我會再講多d關於地獄少女嘅野~!)

Share on FacebookShare on Google+Tweet about this on Twitter

4 Responses to 戀上地獄少女

Leave a reply


Optionally add an image (JPEG only)