Monthly Archives: July 2010

日本人不知道的日本語

自從「Q.E.D.証明終了」之後,我就養成咗追日劇嘅好習慣。之前唔係唔睇,而係唔會追。多數等套野完咗一次過執隻祖國出品返黎睇咁。

Anyway,今季日劇本來零期待。睇埋啲出演者,期待低跌入負點。但係我點都會俾下面每套睇一集先決定睇唔睇落去。但係出乎意料之外,今季嘅日劇雖然無我特別鍾意睇嘅演員,但係幾乎套套都好好睇咁喎!

今日首先介紹嘅係「日本人不知道的日本語」。
本來想講「美丘」先,但係今日一放工返到黎,竟然見到意想不到嘅事!
mo娘嘅亀井絵里會响「日本人不知道的日本語」第四集出現!

WOW~~!

近年其實都好少理eri架啦,但係mo娘有成員出日劇始終係有啲high!而且一click入去… 嘩!!女僕!!貓耳!!

萌え〜〜〜!!

好耐無見過eri咁cutie啦!!期待8月5號!

講返少少套劇。
呢套劇係講有一個女教師無意中入咗一間為外國人而設嘅日本語學校教書。本來以為自己係日本人,教日本語無難度,點知第一堂就俾學生嘅問題考起。佢先發現,原來有好多日文,連日本人都唔會留意到。

呢套劇本身已經幾搞笑幾好睇。而對而家學緊日文(無論係高級定係初級)嘅朋友應該仲幾有幫助添架!推薦!!

ちゅり♪高柳明音

最近感覺到自己異常地愛上明音。 其實都唔係好最近。事實上我愛上明音已經幾個月前嘅事(係我突然愛上真野恵里菜之前嘅事)。而當佢入選AKB48選拔之後,我就突然之間好愛佢。直到「ごめんね、SUMMER」個PV出嘅時候,佢搶我視線嘅事實就更加明顯。 早幾日收到網友送贈嘅一張SKE48相(再一次多謝晒!), 竟然發現自己第一句「KAWAII~~~」係望住明音講嘅!!當然,玲奈公主都超可愛,但係最近真係俾明音個無邪樣轟得應一應!萌死了(>s<*) Continue Reading

成長・絆

之前講過寫真集,今日再補充少少。 5月27號,愛妹出咗佢個人的第11本寫真集。考慮咗好耐好耐之後,我還是決定要支持。但係5月尾撞正AKB48投票要大量入貨,以及最近超愛真野恵里菜,所以隔咗近兩個月先成功入手。 我跟咗Hello! Project咁多年,買得最多嘅唔係CD,而且寫真集。初期我係mo娘5期6期嘅成員所有寫真集我都買齊。不過慢慢感情轉淡,到後期就淨係買愛妹嘅。(而家連愛妹都要諗。唉,真係心感抱歉。) 作為 一個寫真集收藏者,又鍾意咗愛妹快9年,我當然有晒佢由出道到而家嘅寫真集啦! 以上12本寫真集,除咗第1行第左邊第1本係mo娘第五期成員4個嘅寫真集之外,其餘嘅都係個人嘅。一共有11本。 我由第1本就開始支持架啦~個人最愛係第3行第2本嘅 「もうひとつの愛」。呢本係2008年出,係愛妹留返長頭髮之前最後一本寫真集。其次就係第1行第4本嘅 「わたあめ」。可能我都係比較鍾意睇愛妹可愛嘅一面多過佢型同sexy嘅一面啦,所以啱啱講果兩本,其實都比較係個feel細個啲。 第3行第4本就係最新出嘅「形」。睇個封面好似好性感咁,其實裡面啲相都唔係好咩架咋。就算係果堆嘅床上面滾來滾去嘅相都唔係太誇張。而且同AKB48果d比較,只係唔多野睇。 從 寫真集入面可以睇到愛妹嘅變化。可以話睇住佢大。 呢堆寫真集唔單只見證住愛妹嘅成長,而且都見證咗我鍾意佢嘅歷史。嗯。 Continue Reading

第二回合:寫真集

唔鍾意比較Hello! Project同AKB48嘅朋友仔就唔好睇落去啦。嗱,通知咗架啦! 第一回合响呢度。都… 成10個月前嘅事啦。哈! 第二回合係鬥寫真集。 由於我鍾意咗日本女性偶像都好耐,又睇咗佢地出嘅寫真集咁耐,一般我都唔會覺得有咩「問題」。就算係著比堅尼,我都唔會覺得係咩一回事。我屋企人同身邊嘅 朋友有時睇到mo娘啲寫真集,佢地會有啲覺得佢地太性感,有啲女仔朋友會覺得有點兒那個。但係可能我慣咗,所以我一啲都無呢一類嘅感覺。而且有時比堅尼都幾好睇吖。好似同佢地去玩水咁,幾開心~? 我一向都覺得自己對呢啲所謂嘅性感寫真嘅接受能力比較強。 但係實不相瞞, 我第一次睇前田敦子嘅寫真集「はいっ。」嘅時候, 其實我係嚇咗一跳。 乜原來,Hello! Project所謂嘅性感,真係無乜野。小巫見大巫就係呢啲。如果係以純偶像(我意思係唔計AV)嘅尺度黎講,佢地都幾無底線。 後來再睇埋「あっちゃん」同「ATSUKO」,真係不得不O嘴。 其他成員例如大島優子同柏木由紀嘅寫真集都有返咁上下。唯一係佢地嘅感覺比較健康少少,陽光氣色多少少,同埋感覺上比較著重嘅整體嘅美感方面。而敦子果啲就比較俾到啲幻想大家。好似AKB48對上一次出果本寫真集,好似叫「ワガママガールフレンド」?果本我就真係無買啦。因為太成熟,太性感啦。 借朋友一句話:如果Hello! Project果啲叫做「性感」,咁AKB48,尤其係前田敦子嘅寫真集應該可以叫「色情」==; 當然,我無貶低敦子嘅意思。我自己都鍾意佢,以上提到嘅寫真集我都有買。 但係只係發現,如果自己仲係困住响Hello! Project入面嘅話,睇到嘅世界原來真係好細。 我以一個女性fans嘅角度睇呢一班女仔嘅寫真集嘅話, 如果你問我接唔接受得到呢,我可以話俾你聽我絕對接受得到。其實我覺得無乜咁大不了。不過,而家環觀咗H!P同48嘅寫真集之後,你問我perfer邊個呢,我可以好肯定咁答你,我係比較鍾意Hello! Project果啲啦。理由非常簡單,就係因為無咁性感(色情?)囉。接受得到唔代表鍾意嘅,係咪?我個人比較鍾意啲cute啲嘅相。清純啲,生活感強啲嘅相我最鍾意。同埋校服look係一個must啦! 但係換轉以一個男性fans嘅角度,又會唔會係因為呢啲而鍾意48系嘅啲多啲呢?Hello! Project同48系都應該係主攻男性市場,咁48系係咪會比較有利呢? Continue Reading

MANO MODE

今日繼續MANO MODE。 呢個pattern咁熟口面嘅?咦?唔通係開放期??不過又有個疑問… 乜一個人可以入兩次開放期架咩?根據我呢個post,恵里菜已經出現過响我2009年嘅開放期!同埋我搵返啲harddisk data,發現原來我由上次開放期之後一直都有keep恵里菜嘅file,直到我鍾意咗AKB48先停。所以我認為今次唔算係開放期啦,而係我回流。 其實一切都係心態問題。最近現實生活上真係有好多野煩。yes,唔只一樣。我係果隻有煩惱都唔係好識同人講果種,甚至可以話,我係直頭唔會同人講野果隻。所以通常有野煩我都會自己响度「畫地」。但係今次有啲唔同。因為恵里菜,令到我最近每一日嘅情緒都好高漲。埋頭睇佢可以令我忘記啲煩野。同埋個人心情靚諗野都正面啲。而且唔知係煩慣咗定咩,今朝我突然之間覺得,其實煩惱同希望一樣,都係人生不能缺少嘅。無晒煩惱會唔會反而令到人生太平淡呢?視煩惱為一種挑戰之後,令到有煩惱嘅自己感覺自在咗好多。有時新野未必唔好,只係視乎你去唔去接受佢。嗯。兜返黎,呢一方面正正就係我今次放恵里菜入黎我個世界時嘅心態。 鍾意AKB48之前,我做人處事無論係生活上工作上定係偶像上都相信「不變勝萬變。」好怕新野好怕改變。所以响追星上,就算我見到一啲我覺得唔錯嘅人,我都唔想去睇佢。因為我怕變。我唔想自己唔再係Hello! Project嘅fans,我唔想自己唔係愛妹fans。但係其實有好多好野等我去發掘。雖然話每年都有所謂嘅開放期,但係end up都因為一句不變勝萬變,睇一陣就會返轉頭。根本唔想去接受新事物。但係自從上年「失守」接受咗AKB48之後,我就發現,原來唔接受新野係好蠢嘅一件事。做乜事要收埋自己?做乜事唔俾自己撞下會唔會有啲野更加啱自己,自己更加鍾意? 所以今次我上個星期有少少feel我對恵里菜有興趣,我就隨心去俾自己睇佢去搵佢啲野。因為我唔想再怕改變,唔想封死自己。俾著以前嘅我,一有少少feel我就會唔去諗佢,响佢未變大之前封死佢唔俾佢發展落去。所以今次我中恵里菜毒中得咁快咁深,唔多唔少都要同AKB48講返句多謝晒。哈!呢幾日內,我幾乎所有野都變晒。本來煩嘅野都唔再煩啦。只要思想正面,其實都無乜咁大不了。 MANO MODE可以維持幾耐我預測唔到。可能佢係我最後追嘅一粒星,又可能聽日我就响度宣佈我唔再鍾意佢。不過,嗯。暫時我個心同腦就交俾恵里菜處理啦(笑) Continue Reading

Death Game Park 小說版!

尋日講過,話買俾自己嘅生日禮物就係Death Game Park嘅小說!! 本野唔係好厚,大慨有二百幾頁。好想好想好想好想快d睇呀~!!!一陣洗完白白就開波!! 聽聞小說版同BeeTV嘅版本有出入,ending都會唔同。我兩樣都未睇,所以唔知。就算睇咗小說,都唔知幾時先有得睇套劇… (求神拜佛BeeTV肯出DVD… 佢唔出我就無機會睇架啦…) 不過照我現有嘅資料,個人設已經好似有d唔同。其實果四個主角我無研究過啦,但係就真野嘅角色-遠藤涼子黎講,劇版好似係話佢自己加入去玩呢個遊戲,目的係要知道佢哥哥死亡嘅真相(佢哥哥就係玩Death Game而死嘅)小說版佢都好似係殺咗人所以先有得玩呢個遊戲。 唔知啦!都係睇咗小說先講啦!BeeTV,跪求你買快啲出DVD… Continue Reading

萌えポイント

一開始講少少題外話先。有一個識咗成10年嘅朋友仔問我,點解最年個blog成日都係寫偶像啲野,佢話我應該寫下自己嘅事咁。咁我响呢度回個應啦。 首先,日本偶像係我最大嘅嗜好。同埋我想我個blog係寫我鍾意嘅野。寫blog係需要時間,而且要去諗果樣野。我用工餘時間去寫blog,做乜事我要諗啲唔開心嘅野先?講真我最近係真係有好多好多好多野煩,好多野唔開心,但係我真係唔想成日都諗住呢啲野囉。點諗件事都無幫助,點解我要日日夜夜都諗住佢呢?所以可以嘅時間我就唔去諗佢。而我睇偶像,講偶像嘅時候我最開心最relax,所以我選擇將佢地將啲開心野寫响我個blog度。就係咁簡單之嘛。其實睇偶像係我最鍾意做嘅事。我同大家都無分別,都係將自己鍾意嘅野寫出黎啫。 好,言歸正傳。標題嘅意思係: 「萌點」。「萌點」同笑點,沸點係同一類野。而我要認嘅係,我嘅萌點其實都幾低吓。哈。係,我好容易中招~!(笑) 無庸置疑,我最近係處於真野狂熱中。唔係話唔鍾意48系同玲奈公主呀,只不過係呢一段時間追多一個baby啫。同埋其實我一路都鍾意佢,只係未到狂熱地帶啫。啱啱果個weekend狂煲咗大量真野之後,我發現佢有好多方面都擊中我嘅萌點。 首先唔洗講,就係鋼琴。Hello! Project入面,佢係唯一一個彈鋼琴嘅人。唯一一個自彈自唱。我好鍾意鋼琴架,雖然自己唔叻。所以見到佢彈,真係好鍾意佢! 另外就係皺眉。好變態,我係好鍾意好鍾意睇人不知不覺咁皺眉嘅。其實已經愛妹時代已經係咁。咁啱,原來真野係成日皺眉架喎!!唔知係佢唱歌唱得辛苦定點呢? 之後就係眼淚!呢點更變態,但係有時睇到佢地喊,真係會有萌嘅感覺。真野你真係估佢唔到,佢真係成日喊==;好似啲眼淚一開水喉就有咁。個個concert佢都要喊過先完到場咁。 仲有就係佢長唔大嘅外表!其實愛妹都係咁。真野嘅外表係比佢實際年齡細個。佢自己都話自己成日俾人當係15歲。但係其實佢唔細架啦,19歲架啦。同玲奈公主同年架。對於鍾意cutie多過sexy嘅我,佢呢一個成日都好似小妹妹咁嘅樣我覺得好萌呀~ 除此之外,佢把cute到無比嘅聲,都直擊我嘅萌點! 仲未完呀!真野响Hello! Project入面係異常地多演出工作。我指嘅係做戲拍劇果啲。我夠膽話,佢係Hello! Project入面最多戲同劇拍嘅人。而最重要嘅一點係,我睇戲睇劇好容易鍾意人。當初前田敦子都係咁。 其實應該仲有,但係我暫時就只係發現到咁多。綜合以上萌點,我好明白我點解而家會對佢咁狂熱。 完全ハマり中!   呀,今日其實係小蝠生日。今個生日意外地係同真野過。哈哈。其實都買咗份生日禮物俾自己!一份小小嘅禮物。但係照我而家嘅情況,應該可以令我好high! 但係可惜嘅係…佢寄唔切過黎!!到咗手嘅,收得張紙咋… 嗯!都好過無啦。明日一早就衝去郵局攞佢返黎! Continue Reading

恋するハローキティ

星期日一大早我响度做嘅事就係响度狂喊。 咩事?? 哦,無⋯其實我係睇DVD睇到喊啫。唔出奇架,我睇戲睇劇喊係平常到不能再平常嘅事。 但係狂喊就真係少啲。 究竟睇咩睇到狂喊呢?答案係, 恋するハローキティDVD!(Koisuru Hello! Kitty DVD) 呢隻DVD出咗好耐架啦。我都入手咗好耐。但係一直都無睇。無時間睇唔得閒睇。大家都知道,AKB48同SKE48係可以令到你好忙好忙好忙架啦。 最近幾日我唔否認我係堆頭咗响真野恵里菜度。 所有睇得嘅野都攞晒出黎睇。マノスパイ(Mano Spy)啦,半分エスパー(1/2 Esper)啦,Pocky Sisters啦,都响兩日間煲晒。所以呢一套舞台劇自然都係煲嘅目標。本來真係期望不大。因為小蝠唔係咁鍾意Hello! Kitty,加上呢個舞台劇俾我嘅印象好幼稚,所以我以為唔多好睇啦… 點知,呢套野一開波我就已經感動到喊。(唔好睇嘅野我係唔會喊架!) ↓↓↓↓↓以下含劇透↓↓↓↓↓ 舞台劇一開始就講恵里菜同S/milage四個係玩具嘅靈魂。佢地努力咁學習人類世界嘅野,同埋身為玩具要為人類做嘅事。 有一日,天神攞咗隻Hello! Kitty公仔黎,話呢隻公仔需要靈魂,問恵里菜想唔想去。但係只要成為咗玩具去到人世界,佢就會睇唔到野,聽唔到野,講唔到野,連佢主人係邊個佢都唔會知道。佢只可以感受主人對佢嘅愛,同埋用心令主人幸福。恵里菜決定咗要去,而佢好快就搵到個主人。但係好快,佢就被主人拋棄咗,將佢擲咗响街。當佢俾雨淋到濕晒嘅時候,有一個男仔用遮幫佢擋雨,又拍咗佢個頭兩下。佢覺得好感動好溫暖。 由於佢已經俾人遺棄咗,佢嘅玩具靈魂朋友就將佢嘅靈魂抽返出黎。就响佢正要返去玩具世界嘅時間,佢向天神許咗個願,希望自己可以變成人類,佢搵拍拍佢個頭嘅果個男仔。天神應允咗佢嘅要求,但係有三個條件。第一,佢只可以做三日人。第二,佢唔可以透露佢係玩具嘅身份。第三,佢要响呢三日之內得到呢一個男仔嘅一個kiss。如果佢做得到,佢就可以真真正正咁變成人類,但係如果做唔到,佢就會灰飛煙滅,永遠消息响呢個世界上。恵里菜諗咗一陣,都決定要去。 好快佢就搵到個男仔,仲入咗佢果班做插班生。佢發現咗,個男仔同班上面一個女仔交往過但係分咗手。佢仲從個女仔攬住佢嘅感覺發現咗,原來自己(隻Hello! Kitty公仔)係個男仔送俾個女仔嘅,响佢地分手果時,個女仔唔要咗自己。 當佢知道個女仔好後悔唔要隻公仔同埋原來佢兩個都仲好鍾意對方嘅時候,本來好努力令到個男仔鍾意自己嘅恵里菜,就決定要幫佢地復合。最後,恵里菜雖然得唔到個男仔嘅kiss,但係就令到佢嘅主人得到幸福。 三日期限過去,恵里菜有晒心理準備要消失嘅時候,天神出現,同佢講,雖然佢做唔晒果三個條件,但係佢做到作為一件玩具嘅使命,令到佢嘅主人幸福。 所以佢唔洗消失,可以做返玩具。而當個男仔再一次送隻Hello! Kitty公仔俾個女仔嘅時候,恵里菜就搵返佢嘅主人啦。 一開波我已經好感動啦,因為原來啲玩具係咁偉大~(違==;) 之後當隻公仔俾人遺棄,我已經忍唔住喊啦~後來中間都有好多感動位,到最後,恵里菜為咗一個拋棄過佢嘅主人而願意消失,果一part真係喊到豬頭咁==;(in fact,我睇第二次都忍唔住⋯) 雖然我成日睇戲睇劇會喊,但係一開波就喊真係極之少。好感動呀,呢個舞台劇! 無論你鍾唔鍾意Hello! Kitty同恵里菜,我相信如果你擁有過玩具同埋仲有少少童真,你都會愛上呢個舞台劇! Continue Reading