Monthly Archives: August 2009

Hello! 獸醫!

早幾日開始,就發覺布施對眼仔有d唔妥。
初初都只係覺得:「咦?布布,你對眼做乜細咗?」
但係之後就發現,佢對眼仔真係有d問題。

見唔見到佢隻眼好似有層膜咁?
其實媽咪最近都話,同佢玩拋野食佢成日都接唔到。原來佢係睇唔到!
今朝起身同佢上天台方便,佢上樓梯嘅時候竟然叉錯腳碌咗落黎,我就知道事態有d嚴重。
於是就即刻換衫,同佢落去睇醫生。
結果原來佢患咗眼膜炎… 要打針食藥兼滴眼藥水。

之後諗住,既然上到去,就順便驗埋有無心絲蟲… (因為成日唔記得而停咗藥成半年有多)

結果係Negative!!無事無事!!
買埋d心絲蟲預防藥,$970出門口…
無所謂啦~ 最緊要布施健健康康啫!

8th Anniversary

又到828啦!!又一年.今年係8週年啦!! 兩日前(26號)係第五期成員出道8週年.慣例地, 兩日後嘅今日就係我鍾意愛妹嘅8週年記念日!!前年慶祝咗6週年, 原來上年828無寫blog, 無慶祝到7週年. 而家我正好好好好好努力咁回想, 我舊年8月究竟搞乜鬼. 踏入第9年啦!!!都係果句: 希望以後都可以慶祝9週年, 10週年, 11週年, 12週年…828對我黎講永遠係一個大日子!! 睇返2007年個828 post… 先發現, 咦? 原來自己兩年前唔係好鍾意愛妹短髮??嘆晒氣咁, 好似好想佢留返長.無理由架~ 無理由喎~!!我最鍾意佢短頭髮架喎!! 點解咁奇怪嘅我??? Continue Reading

忙?藉口!

最近aigokoro.com更新減慢,開始果時明明講話要日日更新,但係而家一年都未夠,就已經大幅減慢咗更新頻率。7月同8月嘅更新基本只可以話係隔幾日post一次。 我好忙咩?做咩唔更新呀?有時候都會咁問自己。老實講啦,係忙。最近有d野趕緊,搞到自己要比平時早起身。而且有d壓力。令到我呢隻豬都竟然會失眠。精神唔夠,身體又出現咗警號。成日頭重重咁。 講到好似好辛苦咁呀呵?但係其實,真係有咁辛苦咩?會唔會係對自己太好,寵壞咗自己咋? 忙,唔係唔更新aigokoro.com嘅藉口。真係忙到咁?一日為愛妹抽10分鐘出黎打幾隻字都唔得?一日用10分鐘諗下愛妹都唔得? 反省下啦,自己!7月8月當放暑假。9月開始,我唔想再用忙黎做藉口啦! Continue Reading

死穴?

相信世上最隨和嘅人都有死穴。我自問唔係一個好nice嘅人,但係都唔係好易嬲果隻。唔易,但係中咗死穴始終都係會嬲。 我個人又衰格。唔識得當場發嬲。嬲人通常都過後先會嬲。自己諗諗下越諗越嬲果種呢!呢個應該係一個幾乞人憎嘅性格。不過,我都算係唔係成日嬲果隻掛。除非中死穴啦。 咁我死穴係咩呢?有一個好明顯嘅,就係愛妹啦。有人話愛妹我好少話會唔嬲。批評ok架,但係唔係惡意lor。有d人好乞人憎,明明無野都係要搵d野出黎講。果d嬲硬。另一個比較隱蔽嘅死穴,其實係我寫嘅故事。都係果句,唔係話唔聽批評,因為有批評先會有進步。但係我好唔鐘意人make fun of我寫嘅野lor。都係嬲硬。唉,所以我都知我一世都做唔到作家。因為寫野出黎俾人睇,就一定會有惡意批評… 以上呢兩個死穴中咗一定會嬲。可以打包單。100%無走雞。但係除此之外,一般都唔會點嬲………… 掛(笑) Continue Reading

Q.E.D. 証明終了

Yes, 我遲咗近半年先講呢套劇. 藉口係, 由於aigokoro.com有講, 所以為咗唔好重複講兩次, 所以中文blog呢度由套劇開始做之後都無提過.事實係, 純粹係我懶啫. 係呀, 對愛妹嘅事都有時會懶嘅. 講返套Q.E.D.先啦. 點解我今日會心血來潮講佢呢, 其實係因為响套劇做完之後, 我一直都响度睇緊套漫畫版. 雖然進度非常之緩慢… (而家先睇到第9期) 雖然電視劇同漫畫有少少出入, 但係睇返漫畫, 就發現有d feeling係可以match返入去個電視劇度, 豐富到响電視劇上面表現唔到嘅感覺. 啱啱尋日睇完第8期, 入面其中一個故事講到校園祭前夜發生嘅事. 呢個故仔就係電視劇版嘅第三集. 當時燈馬自己一個人出咗去, 可奈就出去搵佢. 當佢搵到燈馬之後, 可奈叫燈馬一齊去食晚飯, 但係燈馬就拒絕咗. 當時我唔係好get到佢想點. 以為佢真係好唔鐘意可奈痴住佢. 但係睇返漫畫, 先發現, 燈馬當時正處於一個心理混亂狀態, 佢想自己一個冷靜一下. 因為燈馬本來係一個只會照住自己想法做事嘅人, 但自從返咗黎日本, 認識咗可奈之後, 佢就幾乎係被可奈牽住走. 佢好唔習慣, 而非佢討厭可奈. 睇完漫畫, 真係好想睇返電視套, 可惜尋晚要早瞓… 如果今晚頂得住, 就今晚睇吧! ^^)/ 講多少少啦.Q.E.D.証明終了呢套劇呢, 故事上呢, 我個人覺得比起其他同類型電視劇(例如: 金田一,  柯南, 等)都忠於原籍. 電視劇第七集, 講一個自稱海盜嘅大叔黎偷咗個夾萬嘅故事, 漫畫好似係第廿九期.… Continue Reading

中日女排大戰!!

一年一度嘅世界女排大獎賽澳門站同香港站都打完咗.可惜嘅係我最愛嘅中國女排兩站都只得亞軍. 無計, 國家隊換緊血. 好多老將, 包括楊昊, 我最鐘意嘅ZRR(趙蕊蕊), 前隊長馮坤等, 都唔再响國家隊.取而代之, 有好多新面孔!!一眾新人當中, 我就睇中咗HRQ.邊個係HRQ?? 哈哈, 係惠若琪. 佢雖然唔係成日有得出場, 但係一出場都幾搶眼下.加上佢得18歲, 係現時全隊最年輕嘅成員!希望佢繼續努力~ 因為我好想响以後嘅比賽入面見到佢! 而家國家隊正响東京比賽!由8月19號開始連打5日. 19號對荷蘭20號對巴西21號對俄羅斯 打咗嘅以上三場國家隊都已經輸咗.聽日22號將會係我最最最最最期待嘅中國對日本!!中國隊打三日輸三日, 本來以為日本隊亦都係一樣.點知啱啱果場對荷蘭隊,竟然俾佢地贏咗!咁中國隊有危機啦!呢個狀況入面, 必定有一場激戰~!!超期待!!!!!! By the way…日本隊中我最愛嘅係木村沙織!加油呀!中國隊﹠日本隊! Continue Reading

失而復得

一直掛响我個袋度,我今年生日媽咪整俾我果隻史迪仔公仔,今日返緊工嘅時候發現唔見咗。即時搵晒公司我有去過嘅地方啦,無。大受打擊… 因為真係好鐘意好鐘意好鐘意果隻公仔。但係果一刻仲有個希望,氹下自己話可能响屋企跌咗呢?中午返到屋企,地氈式搜索後,終告失蹤。下一刻,我响度嚎哭。好耐好耐好耐好耐(有十幾年了)無因為唔見野而喊。但係今日真係好傷心。超級傷心。喊咗一陣,諗起,可能真係跌咗响屋企,但係媽咪執到呢?又俾自己一個小小嘅希望,打電話俾媽咪問下,結果希望又係落空。媽咪話無執到。個心當場跌到谷底。因為我知道,無可能搵得返了。忍唔住又喊。媽咪之後就話,算啦,再整過一隻俾你啦。之後叫我記得食飯。聽話走去勉強食咗個米粉。先記得,咦,出事啦!一陣要返工…熊貓咁嘅眼,點算?於是急急咁救亡…濕毛巾,冰袋都用齊。最後戴返副眼鏡!大功告成!返到公司,哼哼,似乎無人發現。安全! 夜晚返到屋企,媽咪就話原來佢啱啱完成咗一隻(佢本來應該係打算放到舖頭的)就俾咗我先。開心到又好想喊。雖然唔係同一隻,但係都有種失而復得嘅感覺。 最重要係,都係媽咪親手整嘅。好多謝媽咪。 今次用咗條好粗嘅繩穿住!!唔會俾佢跌架啦!!!心情大起大跌嘅一日…好攰…噢,聽朝有要事辦,要早起身。蝠去ZZZ了。 Continue Reading