Monthly Archives: May 2009

距離感

最近發覺自己很多愁善感。
响來回公司同屋企之間嘅時間,有時候會開始諗一d無謂野。
例如係,我同愛妹嘅「關係」。

當然,
其實我同佢無乜關係。
就算係有,都係我單方面鐘意佢。同根本就唔識我,甚至將來永遠都唔會識。
呢個道理,我當然從一開始就明白。呢個係追星嘅命運,只能夠單方面付出。
雖然係咁,但係因為實在係太鐘意,
所以不知不覺間,總係响度想辦法縮短我同佢之間嘅距離。
好似係去日本睇concert,去佢嘅出生地,食佢食過嘅野,等等。

我好幸運,
經濟上同家人都可以支持到我去做呢件事。
我真係好想去見佢嘅時候,永遠都有辦法可以見得到佢。
而我同佢之間嘅距離,的而且確係縮短咗。

以前鐘意佢,
只能上網下載圖片或影片。
當識得响網上買野,
第一隻正版dvd到手嘅時候,
真係開心到唔知點形容。
睇完同再翻睇,
翻睇完又再翻睇…
而家呢?
成櫃都係dvd,
但係又有幾何攞出黎睇?

以前可以為咗一張公式寫真開心好幾日。
用野包完又包,驚會整污糟。
而家呢?
公式寫真多到幾個相簿都放唔晒,
公式精品多到自己都唔知買咗d乜。
一打開衣櫃全部都係愛妹黃色T-shirt。
又如何?

以前因為無機會去見佢真係,
所以成日無聊都响度諗,
愛妹會唔會唔係真人覺黎架?
會唔會其實根本係無呢個人架?
後來有機會去睇concert,第一次同佢有eyes contact,
終於發現佢係有血有肉嘅真係,開心到瞓唔著。
而家呢?
演唱會,舞台劇都睇過,
感動過後,又有咩得著?

以前同而家嘅分別,
除咗人大多咗之外,
就係同愛妹之間嘅距離感改變咗。

今年本來都plan話想去日本睇佢。
但係呢排反而有d唔想去。
唔知點解我覺得,
我唔應該再縮短我同佢之間嘅距離。
我應該留多d空間俾自己幻想。

我唔係住响日本。
呢種海外fans特有嘅距離感,
係一樣好特別嘅感覺。
或者,我應該珍惜呢一種感覺。

講咗段廢話。
最後要澄清嘅係,
我講呢段野唔係因為我已經唔鐘意愛妹。
我係好鐘意佢。超鐘意佢。
而且係越來越鐘意。
只不過,
我啱啱發現咗,
我享受佢同之間嘅呢種距離感。
或許以後會變,
可能聽日我已經話俾你聽我要同佢更加接近,
後日我又話我想要去同佢握手。
呢編文章,只係今日呢一刻嘅感覺。

GUNDAM00極度沉迷中…!

最近(其實都唔係好最近,都有成個月)迷上了高達。之前一路都覺得高達係男仔玩意,完全無打算接觸。點知道一睇就鐘意咗,而且對型到爆的機體極度迷上。 上上個星期完成咗我有生以來第一隻模型,1/100嘅Arios。 手工呢… 我自己覺得第一隻黎講算係過得去啦。但係做嘅過程真係好好玩。個模型做得好正,d接口靚到爆。同埋完成咗之後嘅滿足感!!真係好開心! 順便一提,我最愛角色係Allelujah Haptism,最愛嘅機體當然係佢嘅Kyrios同Arios啦。不過今日去睇咗隻00Raiser,好型… 好想買… Continue Reading

好險…

一直用開嘅usb手指今日下午突然離奇死亡。入面所有資料都化為烏有。損失未能估計。 不過有一件奇蹟!我一向將寫緊嘅中文小說放响呢支usb手指。手指入面永遠係最新update。但係奇就奇在我尋晚寫完野之後,心血來潮copy咗一份入電腦入面做backup!咁先令到中文小說部份零損失!其他野都話可能有得攞返,搵返,小說無咗就係無咗。叫我寫都寫唔返。 嘩,真係好險… Continue Reading

忙忙忙忙忙!!!

早排實在係太忙啦。忙都乜都做唔到。首先連載中的中文小說被逼暫停,英文小說就有idea無時間,呢個blog更新又慢咗,砌到一半的模型都無砌… 但係點忙,aigokoro日文版都有update架! 不過慢慢有返d時間,所以好多野都會再開。中文小說已經再開始寫,不過為咗唔想再斷載,所以而家諗住寫多d先開post出黎。英文小說應該會等中文果個搞掂先會再寫。模型都係要等中文小說完咗後先搞! 好,我都要開始寫幾啦! Continue Reading