Monthly Archives: June 2008

甜言蜜語

我已經有好長好長一段時間無追劇睇. 應該已經有幾年.
就算係我大叫好睇, 喊咗好多集嘅<金石良緣>, 我都無興趣去追, 而係等佢做完晒, 用”另類途徑”入手再一次過煲.

但係好奇怪!! 我而家日日坐响電視前面, 等了又等就係等睇<甜言蜜語>.

吓, 唔係呀嘛, 真係嘅?
Yes, 真係. 我今日放工後係有d事要做而無得直接返屋企, 我都死趕爛趕趕返去睇. 真係好奇怪.

不過呢個都唔係奇蹟. 最好笑係, 我睇預告嘅時候, 係見一次鬧一次做女主角嘅徐子珊. In fact, 開始播歌我仲鬧緊佢. 點知一播, 睇多兩睇d片… 我竟然發現自己鐘意咗佢. 前後唔過10秒. 吓, 唔係呀嘛…? 我問咗自己好多次. 難以置信.

不過我好清楚知道, 我真正鐘意嘅係果個好人到有點煩, 但係又幾可愛嘅角色, 唔係真係鐘意徐子珊本人. 不過呢個暫時唔重要. 因為响甜言蜜語播完之前, 對我黎講徐子珊=唐棠.

聽日星期六, 無得睇 >__<
快d黎啦, 星期一!! 我好想睇呀~

Princess Room

Princess Room重新開幕!!! Princess Room係我一個好重要嘅回憶. 佢係我第一個blog. 有好多好特別嘅文章, 我而家都會睇返. 本來已經唔記得咗個password, 但係今日幾經辛苦, 搵得返出黎. 好開心呀, Princess Room復活了!!! Continue Reading

零4 ~月蝕之仮面

終於要出啦…! 實在感動到想喊.http://www.nintendo.co.jp/wii/r4zj/index.html 7月31日號!! 剛好又同mo娘出dvd的日子相同. 好期待嘅一個遊戲. 第一集, 第二集, 第三集都响PS2上出, 我還以為第四集會响PS3上出現! 仲打算要為呢個遊戲買一部PS3~! 不過結果响Wii出, 我又可以暫時慳返幾千蚊啦. 哈哈. 今次個故事同上三集無同通點, 似乎係一個新故事(希望係新系列嘅開始). 暫時都未係好全面知道故事講乜…~ 今次會唔會玩到我喊呢? Continue Reading

我的最愛

咦? 係咪好奇怪點解”我的最愛”呢個topic嘅分類唔係”有愛的每一天”呢?? 事關… 今次要講嘅我的最愛唔係講愛妹, 而係睇Stephy. 不過我唔係話Stephy係我的最愛, 而係講緊套戲啫. 一直好想好想睇嘅我的最愛. 上之後話一定要去戲院睇嘅呢套戲, 但係到上果時無晒Stephy mood所以諗住唔急睇等dvd啦, 後來睇咗嘅同事話我聽好睇, 點知到我去睇嘅時候已經落咗畫… 無錯, 我同呢套戲之間就係有呢一個咁無奈嘅”故事”… 所以一定都有留意住隻dvd幾時出… 一開始又話5月中…  之後就話5月尾… 結果竟然係6月頭… 不過呢d已經唔重要~~ 因為我今日已經睇咗. 本來係想睇Stephy好傻好天真…(爆)不過結果令我笑令我喊令我印象最深刻嘅, 係方力申. 套戲幾好睇, 不過我以一個鐘意睇Stephy嘅人嘅角度黎睇, 我有少少唔鐘意睇Miki果條線. 不過點都好, 我覺得套戲幾好睇. 葉念琛一貫嘅估唔到結局戲, 不過今次個結局我睇完個心有d唔安樂呀… (>_<) 方力申最後果part, 我真係狂嗌… 不過今次小方呢個角色真係幾得. 型得黎又好慘… 我對佢個角色嘅唯一不滿係, 佢實在係成日鬧Stephy…! 小方自己都話, 佢今次個角色係完全地食住佢. 至於Stephy呢, 就真係一個好可愛好純嘅女仔… 就係佢咁可愛, 佢受到傷害嘅時候先會令人覺得咁心痛, 咁肉緊. 呢套戲令我個心痛一痛嘅位係, Stephy第一次撞到小方, 佢舉手扮打Stephy, Stephy縮一縮果個位, 同埋後尾佢好大力咁推Stephy落sofa, 叫佢”走呀! 我唔想見到你呀!!” 果part… 雖然可以令我有心痛感覺嘅戲我都會覺得好睇, 但係呢套真係唔錯…! 真係!!… Continue Reading

我愛UonLIVE!

今日我又用小狗嘅名義, 打咗電話上電台. 上次無提到, 其實我係聽緊UonLIVE. 我因為”某個前主持”而開始聽UonLIVE, 聽聽下, 呢個已經過檔嘅主持個節目都唔聽lu, 反而日日聽深宵直播室. 呢個節目真係越聽越正. 星期三機緣巧合之下打咗電話上去, 通埋. 同自己好鐘意好鐘意嘅主持人傾到計, 差d連覺得瞓唔著… 打咗一次個膽大咗, 知道今晚阿Benny師傅上去, 決心打去問一問野! 前途問題… 一個我諗咗好耐好耐嘅問題. 其實都纏擾住我好一段時間. 我自己本人就比較散慢, 如果唔係可能早就成咗事. 不過最近現有果方面比較明朗, 所以本來已經無問諗呢個問題… 但係始終有咁嘅想法, 而自己又決定唔到, 咁我咪決定問下人, 攞個意見… 結果呢, 係有少少同我期望相反. 其實我心入面係有少少想佢同我講, 叫我唔好改變, 想有個人同我安一安個心. 不過結果唔係咁. 不過當然啦, 我需要令我煩惱嘅事實多過令我安心嘅謊言… 唔… 咁我真係要認真諗下自己嘅事啦. Continue Reading

一年了 & 神秘人

上一年嘅6月4號, 我第一日返而家呢份工. 雖然第一個月係做part-time, 但都算做咗一年. 我好少講公司嘅事, 不過, 今日叫做做咗一年, 咁不如講下啦! 呢份工呢, 其實就好壞參半啦. 唔係差, 但係呢一年內有無諗過轉工呢, 老實講係有嘅. 不過做落又幾好, 同d同事們又幾合得黎, 無乜野就無謂轉啦, 加上話就話人望高處, 但係都要適合先得, 我諗我未搵到我嘅高處. 其中呢, 公司有一個人, 我其實幾鐘意. 不過唔係戀愛果種. 而係同佢有d距離, 但係見到佢會開心果隻. 個感覺有少少似見到愛妹嘅感覺(不過of course無愛妹咁強烈啦!). 至於呢個人係邊個, 係男係女就唔好講啦… 無謂俾人知道啦, 因為一俾人知道咗, 應該就唔可以繼續而家咁架啦…! 奇怪架嘛, 係咪?? 總之, 日日有工開… 暫時, 就滿足住先啦… 之後嘅事, 慢慢再計畫… Continue Reading

藥狗

我而家諗下諗下… 除咗狗糧, 我家布施食得最多嘅, 都應該係藥… 點解佢可以咁鬼弱…?? 唔通係我有問題?! 啱啱上個星期先同佢去睇完咳… 啱啱好返, 停藥不足三日, 佢又肚屙… 今次仲要係唔知咩事… (上兩次嘅迷團已經解開咗) 今次個醫生唔同咗, 佢同布施打針果時… 醫生: “嘩, 好叻喎! 唔怕打針喎~!”我: “… 係呀… 因為… 佢已經打慣晒…” 醫生笑咗一笑, 我就有點兒笑唔出… 又食藥啦… 今次有五隻藥, 又係五顏六色嘅… 快d好返啦! 布施! Continue Reading

國難

唔經唔覺, 又已經6月…回想5月, 話做咗好多野又唔係, 話無做過又唔係. 5月大事, 一定係四川地震.好怕睇電視, 因為一睇個心就會好唔舒服.錢, 係要捐, 不過本人力微…只可以買少幾隻dvd, 將錢捐出去. 講起捐錢,而家行出街, 就見到好多”團體”叫人捐錢.有d得個透明盒, 貼上”四川震災”四隻大字…無團體名, 又無機構名…你敢唔敢捐?? 希望唔好咁多人發國難財啦…為真正需要幫助嘅人出點力…! Continue Reading