Monthly Archives: November 2007

涙の星

尋晚睇咗後藤真希啱啱出果隻concert dvd, 有少少感觸.

其實我近年真係唔鐘意佢, 我都唔明白點解我會睇呢隻dvd, 呢個一原因我都唔知, 相信永遠會係一個… 謎. (貽興wong口吻)

不過一開隻dvd, 佢開場果隻歌, 我一聽就好好好好鐘意. 果隻歌仲留左响我個腦入面, 今朝起身, 仲哼緊呢首歌. 我尋晚覺得係佢最新&最後隻大碟入面嘅歌, 結果, 啱咗一半啦. 隻歌的而且確係响佢隻大碟入面. 但係其實佢係一隻細碟歌…!

SECERT

呢碟細碟歌曲叫SECERT. 一眼就認得出. 但係點解咁好聽嘅歌我當初無留意到? 其實, 我本身係有呢首歌嘅mp3, 但係, 一直都無聽過. 我諗返起, 佢出呢首歌嘅時候嘅情景…

我記得呢首歌我响某d節目入面係睇過聽過嘅. 而我印象中, 我係幾鐘意首歌所以我先會有mp3. 當時我唔識死, 介紹呢首歌俾一個好憎後藤嘅朋友, 結果俾人抦咗一獲, 可能係咁有少少陰影, 後來就無再聽呢首歌, 而我亦都好快忘記咗佢.

後藤已經退出咗hello! project, 今後嘅動向計劃暫時都係零. 就算佢出返黎, 我都唔覺得我會再睇或者聽佢, 因為本身我已經唔鐘意佢. 但係, 聽返呢隻SECRET, 令我不禁問咗自己一句: 如果當時我係有留意呢一首歌, 佢退出嘅時候我仲會唔會好似而家咁冷淡, 甚至為佢嘅退出感到高興? 呢個永遠係一個… 謎. (貽興wong口吻)

我响呢一編blog入面, 已經暗示咗兩次我以前曾經係鐘意過呢個人. 不過, 真係好耐以前啦, 大約, 係6年半前 – 愛妹未加入mo娘之前嘅事. 原來, 真係有反轉豬肚就係屎. 不過無論如何, 佢離開咗h!p, 所有野都過去, 一切恩怨都忘記佢啦…

不過, 佢呢個事例, 又令我諗到, 原來要長時間愛一個人係好難, 尤其係, 當你只可以不斷付出嘅情況下…

離晒題, 我開始唔知自己寫緊乜…

寫作障礙

近呢一排都零產量, 的確令我有少少煩惱. 開咗個故事出黎都寫唔出, 就算寫咗, 都覺得寫得唔好, 又delete返. 其實我一路都有一個好大嘅問題. 就係我太過單刀直入. 如果我諗到個scene, 我就會好想寫果part, 結果, 前後都變得好求其. 同時我唔擅長描述角色外型同環境, 所以我嘅大部份故事, 人物造型都好唔clear, 環境亦都好唔仔細. 唉, 其實咁, 係好大問題. 明明知道問題所在, 但偏偏改唔好… 唔通, 我真係無做作家嘅天份?? Continue Reading

又無做…

今日買咗樣野俾自己, 至於係乜, 日後再講. 呢個weekend, 對我覺講長咗半日, 因為星期五請咗半日假. 本來又有好多plan, 又想好好休息一下… 但係結果, 又會做唔到, 休息都休唔到. 明明聽日要返工, 今晚都仲要搞到咁夜等haromoni@ 唉… 我好攰啦… 幾時可以俾我抖一抖回一回氣…? 聽日我阿嫲生日, 我好錫好愛我阿嫲架! 响呢度預祝佢生日快樂, 身體健康, 年年有今日!!! Continue Reading

滿天星

浪漫長夜星河 記下了詩人留住片刻點點愛火… 呢句係我最鐘意嘅中文歌嘅第一句.淨係聽到呢一句歌, 我就已經覺得好舒服. 感謝王菀之將呢首歌帶到我嘅生命入面,我會努力, 用自己雙手, 在鋼琴上將自己對呢首歌嘅感覺奏出黎… Continue Reading

近況

最近個人平和咗, 所以寫故仔有少少寫唔出嘅感覺. 會出現呢一個情況係因為我寫嘅故仔多數都有悲劇, 加上最近全力寫嘅故仔除咗係幾慘痛之外仲要有少少兒童不宜嘅場面, 所以寫嘅時候除咗個心要鐵石d之外, 個腦要有返咁上下活動先得. 但係最近, 自從布施黎咗之後可能係比較忙嘅關係啦, 一得閒個腦就會自動放鬆晒, 個人都無諗咁多無謂野, 個心平和晒, 所以就算我有心寫, 夜晚打開個file對住, 都真係寫唔出d乜. 不過基本上我都好頻下有writer block(即係一個作家個腦實晒, 乜都寫唔出咁嘅情況), 所以我知道, 俾返少少時間我, 我又會可以再寫返. 因此我無為呢件寫唔出野事件而愁. 其實最近無寫blog都係呢個原因. 另一個原因係因為某一位網友消失咗, 令到我有時無乜上網嘅動力. 上到網都係睇下呢d睇下果d, 無乜目的. 加上佢嘅離開係令到我對網上嘅友誼有咗少少陰影, 直接令到我除咗下載愛妹之外無晒mood上網. 不過係咁咪唔好呢? 我又覺得唔係嘅, 起碼, 我有多d時間做其實電腦外嘅野吖. 不過愛妹同寫作繼續…! 再一個原因就係練琴啦. 最近學d歌比之前d難咗好多, 所以要多d時間練下佢. 而且而家學d都係自己好鐘意嘅歌, 所以好自然就會好比心機去想彈好佢. 唉, 但係少咗網上生活, 有一個好大嘅問題, 就係aigokoro.com嘅更新問題. aigokoro.com初開張嘅時候, 我基本上隔兩日就更新一次. 家陣, 我miss咗兩個星期嘅haromoni@介紹都未做… 好彩有朋友幫手, aigokoro.com先唔會又好似俾人遺棄咗咁… 唉, 今日星期之內我會搞返掂呢兩個星期嘅介紹架啦… 哎呀… 仲有愛妹本寫真集介紹… 死啦, scan都未scan… 好似有好多野未做咁…!… Continue Reading

送我一個家

最近真係… 好似回流咁, 不斷不斷地愛上香港嘅音樂人. 繼愛上王菀之之後, 又再一次鐘意返Stephy, 最近, 日聽夜聽日睇夜睇嘅日諗夜諗嘅, 竟然係一個我發夢到估唔到我會鐘意嘅人… 泳兒. 唔係吓啦… 我都對自己講咗十幾萬次. 真係好奇怪, 因為佢除咗對可愛嘅大耳仔係我杯茶之外, 其他真係同我平時鐘意嘅人差好遠. 不過無論如何, 鐘意咗就係鐘意咗, 我唔會去抑壓呢種感覺, 亦到無必要去抑壓. 鐘意泳兒, 係有一個人要特別鳴謝, 如果唔係佢, 我覺得我連泳兒係乜水都唔會知道. 記得一開始佢同我講泳兒嘅時候, 我問咗佢幾次到記唔到佢係邊個. 當時係有d佢有佢講, 我有我發夢嘅感覺. 同埋, 當時對香港音樂興趣近乎零嘅我, 更加唔會刻意去記住呢個人. 同加上我係一個幾固執嘅人, 當有人介紹一d我唔熟, 甚至唔識嘅藝人俾我嘅時候, 我一般都唔會咁容易接受. 表面好似唔接受, 但係意識上, 已經會多咗呢個人嘅存在. 以為睇雜誌, 睇電視有佢出現, 都會不知不覺咁留意咗呢個人. 呢位朋友仔介紹咗泳兒俾我識之後, 就好似種咗一粒種籽响我個心入面咁, 只要時機成熟, 粒種籽就會發芽生長啦!! 泳兒嘅呢粒籽呢, 其實都有幾多天時地利. 事關呢, 我返工放工都會經過英皇個大電視. 有好多時都會咁啱睇到泳兒嘅mv. 雖然係無聲, 但係見得一個人多, 果個人自然就會順眼咗. 同埋, 睇地獄第19層嘅時候有佢. 雖然佢出場幾少下, 但係已經足夠留咗一個極好嘅印象俾我.… Continue Reading